呢排香港瘋狂落雨，大家都無可避免要落雨訓練越野跑，今次請到Run to Play越野跑教練Plato同大家分享「濕滑山徑注意小貼士」。
1. 香港夏季山徑訓練有乜需要留意？
夏季嘅香港主打濕熱，準備7-9月外國越野賽嘅跑手，喺香港嘅訓練要注意3個層面：天氣、地點、裝備。
1.1 天氣：取易不取難，盡可能早點起身避開烈陽高照，盡量 8 點前完成訓練。如遇落雨天氣更可以加長加快該課嘅訓練量，但要喺出現極端天氣指引前完成訓練。
1.2 地點：考慮附近有無補水設備或水源，高溫下操練身體會出現唔同嘅反應，喺初起感覺有不適時應立即以水淋頭及補充足夠水份。頭部係人類判斷冷熱嘅敏感部位，以水淋頭可幫助頭部比訊號身體現時仍可繼續正常運作，減低熱衰竭及中暑發生嘅可能。
- 1.2.1 水源及陰涼地點：例如環塘路（如九龍水塘圈、大欖水塘麥徑環塘或香港仔水塘等），可以避免太陽直射，減低體力負擔。
- 1.2.2 繞圈訓練：喺某士多或位置放置補給品，完成約 1 小時距離嘅操練圈後抵達補給品位置進行補水及補卡路里（夏日最少 500ML 水份及電解以及 300 卡路里每小時）。
1.3 裝備：越野裝備應以輕便為主，多使用比賽時會用到嘅裝備及補給去比身體習慣。濕熱嘅天氣已經令身體造成負擔，如再加上沉重裝備好難模擬到接近比賽配速。建議裝備不多於 3KG，例如 2L 水、GEL、BAR、固體食物、行山杖、頭燈、急救用品等。
2. 跑到濕滑泥地有冇咩方法可以避免打滑？
2.1 核心肌群訓練：遇濕滑泥路上核心肌群要有足夠力量去支撐，因為濕泥平衡上腳腕力量會比核心少。建議多做針對核心肌群嘅訓練，例如喺瑜珈球上做平板，使自己能喺唔同平面上都可以運用核心力量做平衡。
2.2 步頻：平日習慣高步頻操練可以喺濕滑泥路上避免打滑，因為高步頻跟觸地時間成反比，步頻越高觸地時間越短。短觸地時間可減輕每一步落腳嘅身體重量，避免打滑。可以想像每一步都係踩落電子磅上，要以體重嘅 1/3 或 1/2 落腳後便離開地面去下一步。
3. 上落濕滑石級及滑石有冇需要注意地方？
3.1 四頭肌及臀部訓練：上落濕滑石級對四頭肌及臀部要求好大，建議做大量嘅單腳針對四頭及臀部訓練，例如基本嘅 body weight RDL 針對臀部及 body weight single leg squat。呢兩個部位夠強壯可以減輕對腳腕嘅負擔，避免拗柴。
3.2 落石級技巧：落石級時盡量保持腳落點喺自己重心下邊，遇上落差大或比較闊嘅石級，落點容易偏離引致 overstrike、踩空級或拗柴嘅情況。最理想嘅情況係控制返落腳點喺自己重心範圍內。
▼ Follow Weak Ends Here
Website: https://www.weakendshere.hk/
Facebook: https://www.facebook.com/weak.ends.here/
Instagram: https://www.instagram.com/weak.ends.here/
