張敬軒自資開萬人生日會　望大家學習體會「共贏精神」

張敬軒將於2月1日生日，由他自己自資、一連兩場招呼逾萬名歌迷的「張敬軒官方歌迷生日會」昨日（1月14日）於澳門倫敦人綜藝館舉行，大會找來軒仔的契家姐胡蓓蔚及商台DJ阿正擔任MC。

生日會一開始便播放出張敬軒官方迷會（HCFC）最新會歌、由軒仔作曲的《以你命名的恆星》作為序幕，由於歌曲是專屬於官方歌迷會的年度禮物中，所以不會派台、不會公開聽到。軒仔得知很多歌迷未能到現場跟他慶祝生日，所以他特別自費，安排網上會員的限定直播，令所有官方歌迷會會員都能夠收看昨日的生日會。

生日會主題是「軒公生日 你哋大晒」！雖然這是軒仔的生日會，但其實是他氹過萬名的歌迷開心，歌迷收到這份心意後，都自發性拍了很多生日片，並於會場內播放。場內又播出歌迷於今年「叱咤樂壇頒獎禮」場內場外為軒仔應援片段。軒仔說：「我覺得好感動，叱咤嗰晚因為唔係個個都有飛，見到佢哋揸住Tablet、電話，冒着寒風睇張敬軒有冇攞獎，原來佢哋喺出面係咁睇show，所以我啱啱都眼濕濕……頂唔順。」

好友林家謙、陳卓賢（Ian）、Tyson Yoshi及魏浚笙（Jeffrey）亦有拍片向軒仔送上祝福，又分享與軒仔間的小趣事，例如跟Jeffrey拍電影時，鬚根會無故地生了出來，他大讚軒仔特別留意生活上的小細節，「有一日佢話：『積肥，買咗個新鬚刨俾你，我覺得係最好用。』軒公教識咗我哋乜嘢係施比受更有福。」

Ian除了祝福，更着他要吃多點吃飽點；Tyson Yoshi則形容軒仔是黐總佬，「感激認識軒公呢幾年，喺無數個公關災難出現前拯救咗我好多次，呢個『黐線佬』好鍾意派錢，每次開工都塞利是俾我，感謝你咁take care我，無論係工作上或者日常生活上，希望有一日我有足夠強大可以take care番你，而家呢一刻就難啲，我會努力。」而對着軒仔便嘴上不饒人的林家謙繼續串嘴，「你又再次告別你嘅青春啦，同埋恭喜你又遠離我一歲啦，哈哈。我想送個創作人獎俾你，因為聽講你走數多年，希望你新一年盡快找晒啲街數。」看到軒仔大叫他收聲，十分搞笑。

軒仔透露，前幾年看了由日本企業家稻盛和夫寫給年輕人的一封信，當中提到「共贏精神」：「睇完佢本書，對我嘅人生、價值觀有全新嘅睇法。入咗行咁多年經歷咁多代嘅歌手，由我同年嘅吳浩康，一路到當我哋仲係細蚊仔嘅時候第一排係陳奕迅、李克勤、古巨基；到同我同輩嘅方大同、張繼聰；到我嘅後輩側田、周柏豪、陳柏宇；到而家嘅陳卓賢、林家謙等等，每一代嘅歌手我同佢哋都係competitor，但我發現我從來冇因為攞唔到獎而唔開心，或者因為對方攞到獎而妒忌。由細到大我覺得我阿媽教得我最舒服嗰樣嘢，就係我好識得去為人哋開心。所以大家不妨改變你嘅信念，試吓改變你對呢啲事情嘅反應，試吓開始將『共贏』呢兩個字放入你嘅社交入面，好多時都做到㗎。」最後，整個生日會以歌迷會的第一首會歌《懷舊情人》作結。