財政預算案2024｜經民聯帶同道具刀及辣椒　指全面「撤辣」起振奮作用｜Ray Online

財政預算案今日宣布全面撤銷樓市「辣招」，一向爭取「撤辣」嘅經民聯立法會議員今日悉心佈置記者會，將一大抽道具辣椒鋪滿枱面，再每人攞住一把道具大刀「切辣椒」，寓意全面「撤辣」！

經民聯副主席林健鋒話全面「撤辣」起振奮作用，「寧買當頭起，個市死氣沉沉冇人會嚟」。佢認為可以為樓市鬆綁，喺短期內就可以睇到效果，而且今年有望減息，有信心刺激樓市交投量，增加賣地收入。至於措施會唔會導致炒風重現，林健鋒話唔可以「船頭驚鬼船尾驚賊」，話撤辣係「遲來嘅春天」，又認為樓市「油浸都唔肥」，「撤辣」好緊要。

放寬按揭逆周期措施帶來喜訊

經民聯主席盧偉國話「辣招」係用嚟壓抑當時過熱需求，目前情況已經完全唔同，而樓市價格實際上受唔同因素影響，話需要有健康穩定嘅發展。經民聯地產及建造界議員龍漢標就話，金管局同時宣布放寬按揭逆周期措施，對有意上車嘅人士帶嚟喜訊。

原文刊登於 AM730

睇完新聞，記得追蹤am730以下平台，接收最新、最啱你嘅消息！
Facebook：am730 (https://www.facebook.com/am730hk)
Instagram：am730hk (https://www.instagram.com/am730hk/)
YouTube：am730 (https://www.youtube.com/c/am730video)