【劇透影評】《盜月者》充滿驚喜　動作場面拳拳到肉！

《盜月者》作為近年少有警匪題材以外既動作片，我入場前都唔敢抱有太大期望，點知充滿驚喜。雖然唔係典型賀歲片，但相當適合新年輕鬆睇，大家有時間一定要入場！

(以下有劇透)

《盜月者》故事新穎，節奏快，劇情不斷推進，無咩多餘枝節，毫無冷場，仲善用各種伏線，一環扣一環。由構思偷錶大計，到後段金蟬脫殼既鬥智鬥力都相當精彩。轉折亦編排得出色，令人意想不到，特別係Edan最後露隻錶出嚟個下，真係型到震，成個戲院都wow咗一聲。

電影仲加入咗唔少有趣元素，好似賣錶行業既運作，解鎖夾萬既動畫，以至日本黑幫。我特別喜歡佢地喺日本比追殺個段，動作場面拳拳到肉，緊湊得手心冒汗。

此外，角色性格分明立體，一開始已經將佢地背景簡單清楚地交代，即使用咗Mirror三位偶像參演，但無因為想服務粉絲而令劇情失焦。

Edan角色發揮空間最大。由起初被迫參與，逐漸投入喺團隊中，充份發揮佢機智本色，非常吸引。演咗幾部電影後，Edan演技明顯變得更成熟，今次可以稱得上係代表作。

Anson Lo同《過時過節》一樣放低偶像包袱，角色各方面都同佢本人非常唔同，驚青中又要裝作鎮定，佢演得自然，仲難得見到佢參與動作戲份，有滿滿新鮮感。

姜濤演反派亦頗有驚喜，做到個種大哥既霸氣；張繼聰同白只更加carry全程，非常搶鏡。

當然，依套電影並唔係十全十美，劇本其實唔算太嚴謹，有啲細節或者鏡頭亦有點瑕疵，不過無損整個觀影體驗，我就睇得舒服開心，絕對係一套出色既港產片。

我明白有部分觀眾當見到偶像擔正既電影就會卻步，但由上年《七月返歸》，到今年《盜月者》都證明偶像同樣能夠演好戲，希望大家可以比多啲機會依類港產片！

▼Follow hkpopculturelover
Instagram: https://www.instagram.com/hkpopculturelover/