根據Fabrizio Romano嘅報導，曼聯中場球員艾歷臣(Christian Eriksen)對於自己目前係球隊嘅角色感到沮喪，並與領隊坦哈格就此事面談。
現年32歲嘅艾歷臣係2022年夏天以自由身加盟曼聯，上季係各項賽事44次正選上陣代表曼聯出戰，不過今季隨住文奴(Kobbie Mainoo)嘅冒起，艾歷臣嘅上陣時間則大幅減少。今季佢係英超上陣16場，其中只有9場係正選上陣，自2月起7場英超賽事有6場都係坐後備坐足全場，另外1場係對富咸後備上陣37分鐘。
廣告（請繼續閱讀本文）
根據報導艾歷臣仍然支持領隊坦哈格，但無可否認佢係對於目前嘅狀況感到失望。艾歷臣表示：「我過去曾表示對於自己無份落場會唔滿意。球隊現時表現很好，因此我需要尊重目前嘅角色。對我而言，我一直努力訓練以保持狀態去比賽。」
「我同坦哈格有會面傾談，其中表達到我唔滿意目前狀況同希望想盡可能參與比賽。然而坦哈格表示呢支球隊係我所選擇嘅球隊，而文奴表現很好，其他中場球員亦表現出色，所以你需要透過競爭去贏得位置，當你效力大球會就要接受呢種情況。」
其實對於艾歷臣不滿上陣時間係能夠理解，同時對於坦哈格嘅決定則更能理解，因為艾歷臣目前嘅速率同體能已經難以跟上英超節奏，踢到60-70分鐘就需要換走。與此同時，過去嘅時間如果係麥湯文尼同艾歷臣打雙防中，麥湯上前後艾歷臣踢單防中又難以做掃蕩嘅工作，反而加斯美唔復出後就可以做好呢個位置，因此直接競爭對手真係年前嘅文奴，但文奴係上一場對利物浦已經展現到腳法、活力同走上走落嘅能力，所以只要文奴無病無痛，艾歷臣係曼聯嘅上陣時間只會越嚟越少。
廣告（請繼續閱讀本文）
▼Follow 足球港場
Instagram: https://www.instagram.com/footballarena_hk/