身兼行政會議成員嘅資深大律師湯家驊，尋日喺facebook撰文滲出濃濃葡萄味，皆因佢自揭同前律政司司長袁國強多番就法治等議題投稿去《紐約時報》但食白果，反而《紐時》就登咗青年新政游蕙禎撐港獨嘅文章，覺得嗰份係令人奇怪嘅報章。
到底事實係咪咁？八方向《紐時》查詢，發言人話喎，佢哋就住香港民主發展嘅議題，其實早於去年已經刊登咗行政會議成員兼立法會議員葉劉淑儀嘅文章，題為「Hong Kong's Democracy Dreams」，發言人話喎，該報論壇版目的，係邀請持不同意見兼了解情況嘅人士進行理性討論，「我們已就此議題（香港民主）刊登兩邊意見，包括去年這一篇（葉劉淑儀的文章）」，當然發言人冇解釋，點解揀葉劉撰文而唔吼湯狀……
廣告（請繼續閱讀本文）
咁講法，湯狀仲有冇機會喺《紐時》表達意見先？答案係有嘅，不過有啲限制囉。發言人話喎，《紐時》相信公開辯論嘅精神，編輯亦好歡迎袁國強同湯家驊嘅回應，仲向八方提供咗有關投稿嘅超連結，呢個連結就係畀「一般讀者」投稿去「給編輯的信」嘅途徑，不過就要求投稿者，最好以150至175字為限囉。
八方今日都問過葉劉，佢自爆2014年佔中起多次向《紐時》投稿不獲刊登，「終於我投咗咁多次，佢哋叫我再投啦，舊年（香港回歸）20周年時就收咗，我係投咗多次，佢先收㗎！」問到「多次」即係幾多次？葉劉就話：「三、四次囉」，笑說：「所以我哋建制派向《紐時》投稿，係唔容易㗎！但我終於都投到，不斷咁寫就投到」，佢仲話覺得湯家驊都唔使咁嬲，最緊要係咩？鍥而不捨喎！