去墾丁（恆春），除咗享受陽光與海灘，最重要係有美食配搭，咁先夠Perfect池咖嘛～今次小編就親身到4間超人氣Cafe，唔單止擁有特色裝潢，有啲仲保留咗好多年前祖先流傳落嚟嘅舊木材，有復古懷舊嘅味道，好啱大家去打卡，同埋享受墾丁嘅特色美食～
1.肥春號
《肥春號》係由3位男生一齊開嘅。你望到個名以為係其中一位老闆係肥仔先改呢個名？咁你就錯啦～《肥春號》前身係一間醫館，老闆就用「妙手回春」嘅回春起名，而台語嘅「回春」係讀「肥春」，所以「肥春號」就因為咁出現咗～佢哋到依家仍然保留住個百子櫃。
店舖所有裝潢都係由呢3位男生自己設計，佢哋店舖外面嘅壁畫都係佢哋自己畫上去！戶外仲有一大片草地，可以輕輕鬆鬆咁坐喺出面感受陽光、享受悠閒時光。
3個人當中有一對係兄弟，有一個就係細佬嘅朋友，佢哋冇想像中Friend到攬頭攬頸，互相調侃，反而充滿默契。佢哋三個人嘅分工：一個負責煮咖啡、一個負責煮嘢食，仲有一個負責同客人傾計～但當日細佬休息，所以負責同客人傾計嘅就要做埋廚房～喺肥春號除咗有私人空間之餘，又帶點溫馨嘅味道。佢哋負責沖咖啡嘅老闆曾經去過澳洲，做過咖啡師，所以佢煮嘅咖啡好香、好好飲！
小編最鍾意食佢哋嘅甜品--蜜糖吐司，吐司外脆內軟，再加埋雪糕一齊食，真係一流，超好食！仲有佢哋嘅西西里凍咖啡，酸酸甜甜，好啱飲咖啡怕苦嘅你！
老闆們話，佢哋推出嘅食物都係佢哋鍾意食，所以大家唔好詫異點解佢哋嘅飯、麵種類比較少～
私心一提：負責沖咖啡嘅老闆超有型咖～（心心眼），導遊帶我哋去嘅時候講笑話：「呢道最出名嘅喺呢位老闆～」
地址：946台灣屏東縣恆春鎮糠林南路15號
2.窩墾丁
嚟到墾丁如果想chill下，搵個地方同朋友飲吓酒，傾吓計？小編推薦呢間單棟嘅「窩墾丁」～佢哋有座酒櫃，放滿唔同嘅酒，有Vodka、whisky、啤酒等～客人仲可以坐喺櫃台前欣賞調酒師調酒，係一件賞心樂事。
窩墾丁除咗可以飲酒，大部分食物仲會會以酒入菜，好似呢道「台灣啤酒蝦」就真係用滿滿一罐啤酒去做，鍾意啤酒風味嘅你一定要點！仲有佢個加咗酒嘅Tiramisu，有少少酒味，好啱淺嚐嘅你哋～
另外，窩墾丁嘅建築主要用木材搭建，營造懷舊復古嘅氣氛，餐台上仲有黃黃嘅燈光，超浪漫啊！係同另一半慶祝紀念日、節日嘅好去處！老闆係學建築設計，而且好鍾意收集古董，無論係閣樓樓梯、庭院～通通都係超正嘅打卡點！趁住聖誕就去「窩墾丁」chill吓啦～
地址：屏東縣恆春鎮網紗里15鄰恆北路8-16號
3.波波廚房
呢間食店係有兩層，下面嗰層係賣意式雪糕，有個open area 做麵包、糕點等等～然後行入啲就有專賣咖啡豆嘅地方。舖中間有個大天井，有種羅馬風情啊～但提提你，上層嘅中央位置係員工休息室，大家打卡還打卡，千奇唔好騷擾到佢哋啲員工啊～
上層亦都有個開放式廚房，畀班廚師們製作異國料理。成個上層都會充斥住美食嘅香味，但又唔會覺得好大油煙～呢間波波廚房賣咁多嘢食嘅？其實係因為老闆本身非常鍾意做「料理」同研發新菜式，咁啱呢座建築嘅地坪夠大，索性就將鍾意嘅食物都通通放晒喺同一間店，等大可以喺同一個空間享受晒3種唔同嘅風味～
條樓梯仲可以當成打卡位添～
佢哋嘅料理好適合台灣同香港人，唔會太鹹，帶點酸酸甜甜，好開胃！
不得不提佢哋嘅意式雪糕（Gelato），每日新鮮製造，並配合時令水果，味道絕對唔輸其他出名嘅雪糕店！
波波廚房隔離係《海角七號》啊嘉的家。呢座建築嘅外牆印有「海角七號」嘅字樣，經常吸引唔少遊客去打卡咖～
地址：946台灣屏東縣恆春鎮光明路88號
大家聖誕節去旅行，去開墾丁恆春嘅話，可以去試吓啊！
Text: Holiday Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）