一月效應準繩度高　熊大教你股市傳統智慧

2019年話咁快就完咗。回顧呢一年，兔兔的投資表現慘不忍睹，原因係佢成日聽聽埋埋班姨媽姑姐的建議去投資，結果「贏就贏粒糖，輸就輸間廠」。

踏入新一年，兔兔都想有個新開始，努力學習做一隻聽熊大話的兔兔，喺投資前先好好做功課，唔好「人買我買」的心態，為未來一年的投資組合做好部署。

兔兔：恒指最近唔聲唔聲喺低位升咗成兩千幾點，熊大熊大，你覺得2020年1月，恒指會係升抑或跌？

熊大：哈哈，我唔係先知，唔識預知未來。不過股市傳統智慧就有「一月效應」（January effect）的說法，以恒指最近個勢升得咁勁嚟睇，估計1月個市應該仲有得升。

兔兔：一月效應？！究竟係咩嚟？剩係1月有效應？2月、3月，又或一年12個月有冇效應？

熊大：首先解答咗你一月效應係咩嚟先。佢係指每年一月的股市都會升多過跌，而1月份的股市表現通常會比其他月份好。

熊大繼續說：一月效應仲有另外一個講法，係指利用1月的股市走勢嚟預測全年表現。即係如果1月個股市升，全年都會升；如果1月股市跌，全年就會跌。

兔兔：係真唔係！？呢個說法的準繩度有幾高？

熊大：睇翻過去十年，恒指1月上升的機會高達70%。不過1月股市升，就唔代表全年都會升。過去十年間，全年股市表現同1月股市表現的升跌都唔係太過一致。至於係咪1月份的股市通常比其他月份好？其實可能關乎到投資者心理，好多人鍾意喺新一年開始整理吓個投資組合，轉倉換馬，又或係建立一個全新的投資組合，所以年初的時候投資者的入市意慾都會強一點，令到1月的股市氣氛比較好。

兔兔：咁除咗一月效應之外，仲有冇其他月份都有股市傳統智慧？

熊大：最多人講的股市傳統智慧一定係「五窮六絕七翻身」，意思係股市喺5月開始下跌，之後6月仲會大跌，到了7月先至會反彈。所以唔少人都會趁半年結的時候將資金重新調配，等到7月就可坐享其成。

熊大繼續說：仲有比較多人識的效應係「聖誕鐘買滙豐」，意思係指聖誕節前買入滙豐（5.hk），聖誕後就有機會獲得不俗的回報。不過呢支歌仔唔係年年唱得響，所以近年都比較少人提及。

兔兔：既然一月效應的準繩度較高，睇嚟我而家都要好好部署一吓。

（兔兔心諗：2020年一定要努力投資贏返過去一年失去的，畀返啲顏色班姨媽姑姐睇。）