Netherlands 荷蘭
缺席2018年世界盃嘅荷蘭，係2021年歐國盃完結後，由雲高爾再度執掌荷蘭國家隊，以不敗姿態首名晉級世界盃決賽週。全能足球嘅踢法配上球員質素，3-4-1-2嘅陣式有雲迪克、Timber同尼敦艾基等球員鞏固後防，右翼衛嘅杜菲斯就得以解放。
縱使中場有韋拿杜姆因傷無緣世界盃，中場仍有法蘭基迪莊做指揮官，加上前鋒迪比往往係國家隊都打到成個自由人一樣策劃進攻，有身邊嘅格普(Cody Gakpo)同貝韋恩(Steven Bergwijn)接應，相信荷蘭首名出線冇乜難度🙌🏻
Senegal 塞內加爾
今屆非洲盃冠軍嘅塞內加爾，前中後都有相當多熟悉嘅名字，包括車路士門將文迪、中堅高列巴尼，愛華頓防中古耶、森林中場高耶迪、李城中場林柏拉斯文迪同前鋒沙迪奧文尼👀
不過陣中核心文尼能否及時傷癒復出成疑，傳聞塞內加爾會請巫醫去幫佢，但同時球隊都都要自救，後場穩陣嘅同時中場夠硬淨，防守強度同體能足夠但創造力有限，因此以體力型踢法出線無難度，但面對歐陸式踢法或許較大挑戰🥲
Ecuador 厄瓜多爾
南美洲四支出線球隊之一嘅厄瓜多爾，值得一提嘅當然係白禮頓三子，卡斯度、艾斯度賓倫同沙利文圖，另外較有名氣嘅包括前韋斯咸嘅華倫西亞(Enner Valencia)，現時效力費倫巴治仲有聯賽嘅神射手🔥中堅方面就有正在冒起後防球員嘅軒基比(Piero Hincapie)，不過厄瓜多爾攻力疲弱，防守上亦無太多亮點，出線機會渺茫。
Qatar 卡塔爾
最後世界盃主辦國卡塔爾，作為其中一支代表亞洲征戰世界盃嘅球隊，FIFA國際排名51位嘅佢地，陣中無任何一位外流歐洲嘅球員，勉強可以講嘅係有一半球員都係效力艾薩特(Al-Sadd)，則係沙維曾經教過嘅球隊，唔知佢地有無吸收到傳控足球嘅踢法呢🤭
不過，陣中隊長Hassan Al-Haydos同Akram Afif都係5-3-2陣式嘅進攻核心，兩位球員都係最近嘅友誼賽對智利有入球並賽和對手，因此能否避免成為「三零部隊」就要睇佢地嘅鐵桶陣同防守反擊夠唔夠直接有效。
▼ Follow 足球港場頻道
Instagram: https://www.instagram.com/footballarena_hk/