相信大家喺唔同嘅網站都有見過cookie嘅身影，唔係「又不是八十年代」嗰個啊，係每次都要你㩒同意嗰個Cookie啊！Google喺幾年前已經多次揚言要移除第三方Cookie，但近日竟然宣怖唔再取消同替換第三方Cookie！
其實係咪好多人都唔知自己平時係同意緊啲咩呢？Cookie簡單啲嚟講，係瀏覽網站時網路伺服器建立既「小型文字檔案」，第三方Cookie會收集有關使用者需求同興趣嘅數據俾廣告商，再向使用者推送個人化嘅廣告，咁就可以更方便咁搵到自己想要嘅商品同服務，所以其實都有佢嘅用處嘅，但隨住大家越嚟越關注私隱保障，好多平台都逐漸淘汰第三方Cookie。
廣告（請繼續閱讀本文）
Google 2020年宣佈會喺2022年前正式停用第三方Cookie，後尾先推遲到2024年尾，再推遲到2025年頭，去到近日正式宣佈放棄移除Cookie，真係好難捉摸啊！Google坦言呢個決定喺因為移除第三方Cookie嘅計劃受到大量廣告商嘅反對，而且呢個計劃需要使用大量人力物力，仲會影響到出版商、廣告商同喺網上投放廣告嘅人士，為咗避免呢啲影響，Google就決定放Cookie一馬啦！
雖然Google取消咗移除Cookie嘅計劃，但佢哋亦有提出Chrome將會俾用戶更多控制權，可以自己決定瀏覽數據被點樣運用，呢個方案可以保住廣告商之餘，又可以保障到用戶嘅私隱，相信係暫時最兩全其美嘅方法嚟！
▼Follow GadgetGang HK
YouTube: https://www.youtube.com/@GadgetGangHK
Instagram: https://www.instagram.com/gadgetganghk/
廣告（請繼續閱讀本文）