67歲的TVB「綠葉王」李國麟 ，入行逾40年，參演過近百部電視劇，多演反派角色，相信觀眾對他絕不陌生。他的演技精湛備受觀眾肯定，更曾三次獲提名《萬千星輝頒獎典禮》的最佳男配角。不過近日他在直播平台「抖音」帶貨八小時卻沒人光顧，被稱為「最慘帶貨明星」。
李國麟直播8小時無人落單淪最慘帶貨明星
李國麟今年四月底北上工作，除了登台演出之外，亦有直播帶貨。近日他落力推銷產品，沒有觀眾下單，他笑言：「我和廠家各補貼200元，大家下單吧！」但也沒有人下單，女助理說道：「你賠錢了！」
直播八小時後，他的雙眼已滿佈紅筋，一臉倦容，惟有網民還嘲諷他：「要不收一收回去了？」、「好好哋退休養老算啦！」、「陰公， 咁老仲要帶貨供個囡讀大學。」令人心酸，還有網民指他樣貌跟以前有分別，懷疑是美顏濾鏡開太大。
浪子終回頭太太高齡產女險被庸醫嚇死
李國麟同太太Angel屬青梅竹馬，由拍拖、分手再復合，最後開花結果。他曾接受本報訪問指自己浪子回頭：「我爛玩佢（太太）咪飛咗我囉，我又繼續開屏，輾轉一齊番開枝散葉，佢係好好嘅老伴。」從前他認為自己未定性、加上社會複雜不想生小朋友，至97年婚後茅塞頓開，他謂：「其實我好鐘意小朋友，尤其見到啲細路女，好似色魔咁『叔叔抱抱』，一抱就唔願放，阿爸阿媽又有啲怨言，決定博一博，一年內有就要，點知第三個月中咗，仲要係女，真係開心到不得了！」
當時李太41歲屬高齡產婦，幸好佗得舒適，唯獨李國麟被一個黃綠醫生嚇到半死，「佢佗到六個幾月去檢查，醫生話佢血壓高有胎毒病，最嚴重會母女不保，我哋喺診所呆咗，咁大個仔第一次感受到晴天霹靂！」兩人為審慎計翌日到政府醫院求診，證實胎兒和母體相安無事，醫生說根本沒有這種病，實在謝天謝地。
藝人工作日以繼夜，連開幾晚通宵不以為過，與女兒相差48載，照顧女兒可能力不從心，他自信十足謂無問題：「暫時唔覺年紀差得遠，十年後可能會，始終我哋拍戲體力勞動，而且我運動量OK，唔會覺得吃力，除非要抱佢啦！」
然而自知中年得女較遲起步，他想但不敢追多個，他感嘆說：「我都好想追，但要衡量自己能力。好似阿Bi咁，如果早啲生將來可以陪多佢幾年，要知自己有幾多極限，當我有75-80歲，睇到佢成年，但可以睇耐啲更好，我阿媽依家仲同我頂吓嘴幾開心。」
疼愛女兒棄名校網 父女拖手嘴對嘴晒愛惹非議
李國麟對女兒Cherie錫到燶，在李太眼中，老公簡直縱壞女兒。例如李太在女兒小時候禁止她吃糖、飲汽水，但他永無say no，搞到李太甚為氣結。而且他不會給女兒太大讀書壓力，他覺得「今日唔識聽日識，聽日唔識後日識。」 人生苦短，求學絕非求分數，當年他放棄跑馬地舊居名校校網，毅然搬到清水灣，他解釋：「一來返工近啲，二來空氣好好多，舊居附近係多名校，但要視乎佢係咪讀書材料，如果入名校，但讀書追唔上，咪即係自己呃自己，讀書壓力好大。如果佢入咗名校，我諗佢會神經衰弱或者精神分裂，我哋會家變！」
由細到大，女兒亦視爸爸為偶像，自細鍾意黐爸爸的Cherie開心就攬住爸爸錫，出街著父女裝拖手，互餵對方分甘同。女兒是爸爸前世情人，李國麟亦喜愛幫女兒影相，經常在網上分享與女兒的生活照，慈父上身。兩父女年齡相差48歲，但感情非常要好，無隔膜，相處時刻都充滿愛，如糖黐豆般，父女情深，實在叫人羨慕。
不過於17年七月時，他因為上載同女兒緊抱慶生的親吻照，一度引來網民爭議。當時李國麟充滿正能量表示：「趁機同佢上一課，每個人有唔同睇法！」而Cherie亦有留言撐爸爸：「女兒親爸爸，一個傳達愛意的舉動，在我眼裡，我看見滿屏都是父愛，在你們眼裡，卻想到亂倫。一個發自親情的吻卻被人們說得如此低俗，我真的感到很可笑。」
以前不想女兒做童星 現在女大女世畀
以前女兒年紀尚少，李國麟被問到會否讓女兒入行，他一本正經謂：「佢細個好得意，無線監制潘嘉德話有角色啱我哋，做番父女，就埋我個期，我拒絕咗，人哋帶啲細路返廠做童星，我喺背後真係『媽媽聲』！唉…呢個係大人世界唔係兒童樂園，就算你係小朋友，我哋做嘢都唔會遷就同應酬你，語言上可能好成人，點解要畀佢接觸咁殘酷慨世界?？小朋友應該去游樂場，一旦污染咗佢思想就無得救！」
不過他心中亦有條界線，女兒18歲前未識分黑白就要聽話，18歲後則可由她作主。現在女兒已19歲，自小受爸爸演戲薰陶，她坦言對演藝深感興趣，對娛樂圈亦充滿好奇。李國麟就叫女兒想清楚，始終娛樂圈好複雜，並非努力就會成功。但他表示不會阻止女兒，會將自己的經驗跟她做分析。他又稱女兒細細個時咩都會同自己講，但女兒慢慢長大又進入反叛期，這年幾已經不像以前那樣無所不談。
不求選富二代男友
李國麟自言是一個好男人，連太太都說來生要他做另一半，因為他從來不過問太太和女兒使錢方式：「我嘅角色係賺錢畀家人使。」Cherie現在有拍拖，他曾直言會呷醋：「如果唔表現呷醋，咁點體會到我係真係疼愛佢？ 」而被問到會不會要求女兒找男朋友一定要富二代，他就回應不會，只要是愛她女兒，不論有錢還是沒錢也沒關係，當然有錢也挺好，但不要差距很大，最重要她的男朋友背景不可以是壞人。