《新聞女王》大結局陳山聰客串現身　演智障爸爸：拍三日同三十集冇分別

TVB《新聞女王》今晚（12月22日）連續兩小時播出兩集大結局，壓軸登場個案人物是陳山聰。他在劇中飾演輕度智障爸爸賴志雄，因女兒嘉嘉離奇墮樓身亡兼一直求助無門，最終捲入持刀及炸彈脅持人質事件，其間更因受刺激令場面一度失控，牽涉其中的Man姐（佘詩曼飾）因而身陷險境。

結局之前在內地平台率先播出時已有不少好評，有人指山聰的演技令人聯想到劉松仁在《大時代》的經典角色方進新。山聰今次放下型仔外表，飾演來自基層家庭的輕度智障爸爸，無論舉手投足、表情聲線都入型入格，完全沒有半點「陳山聰」味，加上失去女兒的痛心、無助及絕望，難怪成功入圍今屆男配角十強。

視帝級的山聰坦言今次角色頗有難度：「我相信係我入行以嚟其中一個幾難演嘅角色，當時鍾澍佳總監製同我講要拍呢個角色時，我都『嘩！』，開頭仲同阿佘講我嚟客串同佢玩兩場戲，我諗住好似Bosco（黃宗澤）咁著套西裝行行企企講兩句對白啫，冇諗過要搞成咁！作為一個演員可以遇到真係有一定難度嘅角色其實係開心嘅。」

雖然只是客串性質，但山聰依然認真對待角色，並專誠找來教開方法演技的戲劇老師一起研究：「我哋用咗好多時間去諗到底呢個角色嘅輕度智障要去到幾多呢？點樣分輕重呢？因為大家都對陳山聰有固有印象，佢突然做個咁嘅角色大家會唔會認同，如果一做錯咗就會有反效果。」

山聰表示，單是角色造型已很頭痛：「因為之前仲拍緊《奪命提示》，所以髪型有所限，原本係梳落嚟直頭髪，但係點整佢哋都係話太有型，想老土啲。真心我呢個髪型係我爸爸以前電過嘅，我係參考佢35年前嘅髮型。」雖然只是拍了三天，但山聰感覺卻和拍了「三十集冇分別」：「第一日朝早06起身已經開始入狀態，直至收工返到屋企已經攰到咩咁。第二日繼續，過程辛苦但非常享受。」他又感激阿佘：「真心今次唔係因為阿佘，我都唔會遇到一個咁好嘅角色，回想返以前同佢合作，佢已經係超班。今次同佢演咗一場好戲，一如以往佢非常有感染力、好易就畀佢帶到入戲，所以拍攝過程好享受，真心希望將來有機會同佢再玩過。」