繼2014年活化三級歷史建築為 F11 攝影博物館之後，蘇彰德先生（Douglas），再成立 f22 攝影空間（f22 foto space），歡迎攝影愛好者前嚟飲住咖啡睇攝影展覽。佔地 9000 平方呎的空間，5 樓及 6 樓打通，並以螺旋樓梯接駁。兩層均作展覽用途，6 樓設有咖啡廳；而 7 樓則用作 VIP 展館。
點解叫做四合一空間？因為f22 foto space係一個結合攝影藝術展覽、書店、相機店同咖啡店於一身嘅空間。週末嘅f22文化味更濃，由攝影分享會、爵士樂之夜、咖啡週末到甜品派對，節目多多，鍾意攝影同咖啡嘅你絕對唔可以錯過f22 foto space。
整間f22 foto space都以黑白為主，突出光影魅力，簡潔而且切合場內黑白照片嘅感覺。
f22 foto space上層展覽廳擺放咗一個銀色大型徠卡(Leica)相機。
不時傳嚟陣陣咖啡香，旁邊就係咖啡店，令嚴肅嘅藝術展覽空間多咗幾分休閒味。Douglas指呵咖啡店係新館嘅一大亮點。「我哋希望呢度係一個文化空間，而唔單止係一個睇展覽嘅地方。」「睇展覽其實要消化，行行下坐底飲杯咖啡，自己思考又好，同人交流都好，邊飲咖啡邊分享攝影嘅點滴，令人同心都可以靜落嚟，時間似乎無咁急。休息好，再去行一圈都未遲。」
café 22
係一間非常有格調嘅咖啡店，售賣手沖咖啡同茶。牆身掛上藝術味重嘅畫作，嚟呢度點杯咖啡，寧靜同富藝術氣質嘅環境或可以令你想出一些新意念。
libro 22
逛完攝影藝術展覽，落一層就係libro 22，libro 22搜羅咗多本珍貴絕版嘅攝影書籍同雜誌，當中包括香港及海外出版商發行，大部分只有一本，令你可以一睹更多大師級作品。
camera 22
而位於大門口左手面則係camera 22，係一間徠卡Leica授權嘅經銷商，搜羅多款優質復古相機、鏡頭及配件供大家購買。
F11 攝影博物館為非牟利運作，以經典大師為主要展覽對象；f22 foto space 則為商業藝術空間，以陳示新晉藝術家、當代攝影作品為主，空間內展出嘅作品全部可以出售對藝術家嘅發展有更持續嘅支持。
「我們十分希望f22能擔任香港及亞洲攝影師嘅平台，將佢哋嘅作品帶到更遠。」
作為收藏家及攝影愛好者，談到f22嘅創立理念，Douglas特別感慨。「同部分攝影師接觸時，瞭解到佢哋好希望香港有一間藝廊可以比佢哋做展覽、售賣作品及出書等，爭取唔同嘅機會。新晉攝影師特別需要呢類支援，一個幫佢哋『出口』到世界嘅平台。」
f22 foto space 喺建築設計上亦花咗唔少心思。設計師同工程師，將相機嘅細節轉化成空間嘅體驗。入口嘅大鏡頭係一道旋轉門，設計師以相機鏡頭作為藍本，頭頂嘅快門，隨住門嘅旋轉控制入口嘅光暗。
一條旋轉樓梯，默然佇立喺門嘅另一邊，設計師參考咗光圈嘅元素，並用樓梯結構嚟演譯光、影同速度嘅交錯。為咗令每一層梯級都有相同扭曲度，設計師運用咗3D 列印鑄造方法，單係製作時間已超過一年。鏡頭門同光圈樓梯都係用「銅」製造嘅，上面塗上「黑色」油漆。上落樓梯時，油漆會被刮走，銅嘅底色就會浮上面，仿照Leica相機。設計師希望f22的人，可以帶走一點什麼，同時也留下一點什麼。
時下最講本土味，小編認為f22正正擁有濃厚本土情懷。從邀請本地團隊LAAB設計全館，到與本土咖啡品牌「半路咖啡」合作，連茶點亦係港產手工美食，Douglas對我城嘅熱愛可見一斑。
f22 foto space位於銅鑼灣，近鵝頸橋，如果由港鐵站行過嚟，時代廣場出口最合適。
f22 foto space（f22攝影空間）
地址：灣仔摩理臣山道70-74號凱利商業大廈5至6樓
開放時間：上午11時至晚上7時（逢星期二至星期六；公眾假期休息）
開放場地：5樓及6樓為展覽區，徠卡相機店及書店設於5樓，咖啡店設於6樓
備註：參觀展覽無須預約
Facebook ： https://www.facebook.com/pg/f22fotospace/about/?ref=page_internal
