自從15年在無綫拍告別劇《無雙譜》後，郭羨妮(Sonjia)近四年推劇又減產，都係為咗頭家，專心湊好6歲囡囡 Kylie及想為國產導演老公朱少杰追多個仔。可惜努力多年未有聲氣。據悉44歲郭羨妮依然未放棄追仔心願，而老公朱少杰又係標準愛妻號，臨近年關提早收爐回港陪老婆囡囡過年辦年貨，郭羨妮順手大舉入貨女性保健品，keep住凍齡又强身健體，趁住呢個新年假兩公婆又再努力過！
撰文：東方新地 │圖片：新傳媒圖片、郭羨妮IG、郭羨妮微博
44歲郭羨妮 恨添丁推劇
當黃澤鋒52歲太太都報來陀B喜訊時，仲唔係世事無絕對、凡事皆有可能最佳例證？更何況後生八年、保養得宜fit過做女時的郭羨妮？11年與內地導演朱少杰結婚、婚後誕下囡囡Kylie，郭羨妮一直不 諱言有心追多個亦都曾成功再次懷孕，可惜14年為無綫拍攝劇集《無雙譜》時疑似操勞過度不幸流產，所以完成劇集拍攝，索性離巢兼減產，四年來主打出席活動、北上商演賺快錢為主，主要心思都放在香港，陪住囡囡長大，亦可以調理身體與老公繼續努力造人。
結婚八年恩愛如昔，日前朱少杰專程從內地趕回港陪郭羨妮和囡囡辦年貨過年，兩公婆去到邊都十指緊扣。
十指緊扣晒恩愛
繼去年暑假全家出埠、再回港過聖誕後，郭羨妮自爆今個農曆年，老公一樣會陪在身邊全家留港度歲。日前兩公婆就齊齊送Kylie學跳舞，囡囡上堂時，兩公婆乘機拍吓拖又辦吓年貨。結婚八年，最鍾意叫另一半「老朱」，一早形同老夫老妻。
不過剩番兩公婆時，郭羨妮同朱少杰一樣甜蜜蜜，在區內商場十指緊扣周圍逛，在零食店入年貨時有商有量、老婆行藥店買保健產品，朱少杰就識做自備環保袋負責出錢又出力。校啱時間Kylie就快落堂，廿四孝媽媽買定囡囡最愛珍珠奶茶等放學，然後一家三口齊齊返歸。雖然追仔努力多年都未有聲氣，不過老公體貼又黐家、6歲Kylie省鏡又乖女，生唔生多個都好，郭羨妮生活已經夠晒圓滿！
凍齡有因
去年夏天一家三口齊齊出埠過暑假及慶祝結婚七周年紀念，心情靚爆郭羨妮極少發放比堅尼全身照，雖然得個背部，一樣睇得出玲瓏浮凸索到爆。
99年香港小姐冠軍郭羨妮近年專注北上發展，鮮有喺香港露面，不過佢喺2016年就現身有線節目《星級會客室》，接受主持人汪漫玲專訪。Sonjia除分享入行16年的辛酸，更大談感情生活，並為外間女尊男卑的傳聞解畫；同時佢已走出小產陰霾，依家同老公努力造人，希望追多個仔！
Sonjia其實自小期待結婚組織家庭，但就一度放棄夢想︰「我收工就返屋企，好難搵到另一半，而且好男人唔多，所以疊埋心水工作。」但與武術導演朱少傑邂逅後，先令佢重拾對愛情的憧憬，所以幾個月後即閃婚！
另外Sonjia又為老公平反，因為外間不時指老公收入少，要靠老婆養起成頭家。Sonjia大讚老公為人老實︰「其實佢不停拍戲做導演，只係比較低調，仲試過讓出總導演名銜俾人。所以好多人唔知道他做過咩，我會多啲提點他。」
Sonjia於2012年生咗寶貝女Kylie，女兒細細個已經遺傳了父母的表演因子，Sonjia亦希望追第二胎為女兒添個伴。但就不幸於2013年小產，佢憶述︰「當時拍緊劇，騎馬、落水、吊威吔樣樣齊，到有日去睇醫生，佢話BB已冇咗心跳，要做手術引流，好似發咗場夢咁。」不過Sonjia早已走出陰霾，現時同老公努力造人中，希望可以在身體許可下追番個仔！
Sonjia真係夠晒老實，提到當年入行經過，佢就大方承認自己真係靠靚樣，因為初時根本完全唔識演戲，仲笑說唔敢睇番自己拍的第一套劇。近年專注北上發展的Sonjia，就話兩地拍劇模式大不同︰「香港工作時間好長，我試過幾日冇瞓，完全唔知自己講咩對白。我經常因為唔夠休息而嘔，真正係攰到嘔！」
睇番資料，Sonjia拍的第一部電視劇係同古仔合作的《尋秦記》，雖然佢就話自己演技差到唔敢睇，不過其實呢套劇至今依然係TVB經典之一，不知幾多觀眾翻睇又翻睇！Sonjia得閒都睇吓啦！
郭羨妮囡囡 幫媽咪療傷
郭羨妮為咗照顧6歲嘅囡囡Kylie，近年減少喺幕前演出，偶爾才拍劇過戲癮，不過去年Sonija拍戲唔小心整親，但囡囡Kylie好細心咁為媽咪療傷，做媽媽當然甜在心，Sonija說：「拍戲時有撞傷碰瘀，雖然痛入心，但回家後有人為我療傷，心仍是暖和甜的。」
選美出身的郭羨妮擁有四分之一的英國血統，五官精緻漂亮，經典作品有《翻雲覆雨》、《洛神》、《尋秦計》、《爭霸》等等。
郭羨妮擁有非常古典的氣質和五官，所以古裝非常適合她，清麗脫俗有溫婉動人，說是古代穿越過來都有人信，難怪傾國傾城的西施和琴清由她飾演都完全無違和感。
郭羨妮就算在其他古裝劇中的造型都非常漂亮有氣質。
盤點年過40生B的女星
其實唔止郭羨妮想追多個小朋友，女星梁詠琪(Gigi)都想追多個！Gigi喺2011年同西班牙藉老公結婚，15年生咗混血小甜心Sofia，其實Gigi一直都好想幫Sofia帶多個細佬或者妹妹嚟呢個世界，即使自己已經係42歲！其實香港女性普遍遲婚﹐因此生育年齡都推遲！而喺娛圈中，都有好多女星都年過40才生B，所以如果Gigi調理好身子，要懷孕應該都唔難！
原文：Sunday kiss 圖片：梁詠琪、李心潔、楊采妮、周汶錡IG，新傳媒圖片
梁詠琪
Gigi與西班牙籍老公Sergio結婚3年後，Gigi終於在2014年8月宣佈懷孕，翌年2月誕下囡囡並改名為Sofia，囡囡岀世後，Gigi經常喺IG post 佢地一家嘅幸福照。一家三口十分幸福！最近有報導指，42歲嘅Gigi早已決定要追第二胎，並在積極努力中！
Gigi兩位好個閨密李心潔同楊采妮，都係40歲之後看生BB，而且咁啱都係生咗對孖仔！
李心潔
2013年老公彭順被爆出軌，李心潔最終選擇原諒老公，兩人和好如初。之後李心潔40歲時，就為老公誕下一對可愛孖仔。
哥哥叫彭濟雲，弟弟則叫彭子然，李心潔喺孖仔滿月嗰陣，PO出一張BB正面相，一對孖仔連瞓覺都識笑，超可愛！
楊采妮
楊采妮2013年同做律師嘅邱韶智拉埋天窗，努力咗3年，終於喺2017年宣布懷孕，同年以42歲之齡生咗對孖仔。
一對孖仔出世後 ，楊采妮喺社交平台留言：「親愛的小寶貝們，謝謝你們，到我們的生命裏來，讓我們對愛多了另一種新體悟。爸爸媽媽一直是懷著感恩的心來迎接你們，我們承諾會用心愛著你們，亦希望你們能在充滿愛和感恩之下，健康平安地成長，擁有自己幸福的人生。」
周汶錡
Kathy今年43歲，2015年7月生咗大仔Jacques ，細仔Avner就喺舊年3月20日出世。
Kathy話第二次懷孕，身體有冇比之前辛苦，佢就話基本上同上一胎一樣，完全唔辛苦，冇嘔又冇好容易就攰，胃口亦都冇變，Kathy解釋指可能因為自己的體質問題，所以身邊的朋友都話佢唔似大肚，整個過程就好似正常生活但個肚大咗。
謝安琪
阿Kay 當年未婚懷孕，07年大仔張瞻出世，相隔10年，40歲嘅阿Kay就再生咗囡囡張靖。
Kay揚言要做全職奶媽，實行無了期停工湊女：「希望可以餵足一年母乳！真係擺低工作，以家庭為先，囡囡都係得幾個月，雖然囝囝10歲，但都係要傾偈嘅階段，只要睇住小朋友開心就乜都值得！」
徐若瑄
徐若瑄以42歲之齡，於2015年誕下囝囝小V寶，不過Vivian陀B嗰陣，由於胎位太低，需要一直卧床直至分娩當日！懷孕期間，總共打咗300支安胎針！呢個B真係得來不易呀！
現在的小V寶已經3歲幾喇，係個精靈、健康嘅小朋友！
李嘉欣
李嘉欣於2011年為富二代許晉亨生咗囝囝Jayden，懷孕時風采依舊，絲毫不見浮腫。大美人當時都係41歲。
話咁快Jayden已7歲喇！而家喺新小拔讀緊二年班。
楊張新悅
42歲嘅楊張新悅（Nicola)與區議員老公楊哲安婚後，先後誕下三個囡囡Lucy、Lily和Leah。Nicola早前宣佈意外懷上第四胎，而且今胎都係B女。
朱茵
2012年4月，41歲嘅朱茵突然上載一張與阿Paul的赤裸相擁黑白合照，公佈懷孕的消息。
囡囡叉燒包於12年10月出世，為作紀念，朱茵執筆推出新著作《6磅10安士》，寫下整個懷孕歷程。她於書中寫到自己很喜歡小朋友，小時候已很想當母親，可惜因身體狀況不好，更自爆婦科醫生曾告知只有一成機會懷孕，要有小朋友是一件很難的事。奇蹟懷孕誕下女兒，對朱茵及黃貫中來說，都不是一件容易的事。
吳君如
41 歲
2006年，41歲嘅吳君如生咗囡囡陳是知，據講當時君如大住個肚，依然晚晚返電台開咪做節目。
吳君如在圈內出晒名的愛女，同時亦管教得好嚴！有報導指囡囡陳是知每年花過百萬學費栽培囡囡，單係playgroup已經年年十萬，仲有報大量琴棋書畫的興趣班，囡囡考入南區私立貴族學校的弘立書院。而在家也營造出一個獨特語境，平時用英文及泰文同囡囡溝通，所以年紀小小已一口流利英文。
劉若英
由結婚到生仔都超低調，45歲就生咗第一胎，當時劉若英仲話想生多個，因為怕囝囝一個人會覺得孤單，所以想多個等佢有個伴。
林青霞
林青霞於1994年與邢李㷧結婚，正式嫁入豪門。42歲生咗大女邢愛林，47歲再生細女邢言愛。
而家兩個女分別係22歲同17歲，都已經婷婷玉立喇！
>