召喚娛樂圈大慈善家 發哥原來先得第四名？

藝人好人好事報到區

做得公眾人物，一舉一動都會比人無限放大。真係唔小心行錯一步就自毀前程。

作為明星最緊要就梗係形象，做善事就係其中一樣好重要嘅加分環節喇！特別係低調默默做慈善，被人爆出黎之後簡直即刻加咗個天使光環係頭上。今日DailyView網路溫度計透過網路大數據調查咗娛樂圈好人好事排行前十位明星，佢地做過咩善事，你又知道幾多？

DV小教室：香港網路大數據觀測咗近萬個網站頻道(而且不斷增加ing)，包括港澳地區的新聞頻道、FB、IG同埋各大討論區、Blog……透過強大嘅網文爬梳觀測，攞到巨大嘅資料樣本數，拎到上億嘅文章及留言訊息，以人工智慧的語意程式做分析。

image source ：Youtube/HK Videos

10 美食同慈善都可以集結一身嘅霆鋒

諗起謝霆鋒只會諗起鋒味？其實霆鋒除咗好識煮嘢食，仲對慈善不遺餘力，之前霆鋒仲講過「如果將美食同慈善結合，所帶嚟嘅幸福感就一定會加倍」，所以幫助失學兒童、義賣曲奇對佢嚟講都只係濕濕碎，佢2017年嘅時候成立咗「鋒助人生」嘅創業平台，幫助年輕人創業，唔怪得連網民都話「想成功就學佢」！

image source:Facebook/鋒味

09 王菲爲女母愛爆棚

王菲同前夫李亞鵬女女有兔唇，當時引起好大關注，事後兩個人成立咗嫣然天使基金，主要幫助唇齶裂兒童做手術，仲有專為未適合做手術嘅小朋友提供一年營養計畫，養好身體，一年後就可以接受手術。雖然李嫣一出世就有呢個「缺憾」，但都因為咁樣，令好多其他同樣有兔唇嘅小朋友都擁有改變嘅機會。

image source:Facebook/王菲頻道 Faye Wong's channel

08「認真D，臨時演員都係演員！

星爺經典對白大家應該都聽唔少，佢做過嘅善事都一樣無得輸㗎。2008年汶川地震，周星馳捐款超過3000萬港幣，係偏遠山區捐助100間周星星小學，當然仲有好多列唔晒出黎嘅捐贈。星爺一向低調，咁多經典電影都無可取代，才華洋溢之餘，善心都一樣好值得大家學習。

image source:Facebook/我們都愛周星馳

07 頭髮就很黑很亮，咁個心呢？

成龍大哥拍咁多武打戲，鐵漢又係咪有柔情呢？言論成日引起關注嘅大哥，其實都有做唔少善事，成立咗成龍慈善基金，係汶川地震嘅時候同合資人楊受成捐款1000萬人民幣，仲有贊助唔少獎學金比學生，為社會下一代出一分力。成龍大哥拍戲親身上陣唔用替身，原來做善事都唔hea㗎。

image source:Facebook/成龍 Jackie Chan

06 曾志偉做慈善呢舖唔洗打和！

獎門人做起慈善都不遺餘力，參與大型籌款活動就唔多講，另外都支持好多慈善組織，投資社會企業素食餐廳，特登請聽障人士提供工作機會畀佢地，所以有關機構頒咗個「無障礙英雄」比獎門人呀！不過近年佢最常被大家討論到嘅都莫過於藍潔瑛事件同埋喺日本同港警高官撞車事件，慈善方面可能網民就冇咁buy啦～

image source:香港演藝人協會

05 演唱會除咗捉到逃犯 仲幫到好多人嘅學友

而學友就更加唔洗講啦～成日開演唱會嘅學友，一定成日收花籃，最近1月先喺紅館開show，仲發起花籃變善款活動，每$100港幣就可以幫到一位病人免費中醫診療同埋3日藥，不過其實咁嘅活動都已經唔係第一次㗎喇！之前學友仲搞過以米代替花籃嘅活動，每次開show都不忘幫助啲有需要嘅人，難怪被稱為「神」啦！

image source:Facebook/張學友 Jacky Cheung

04 你今日撞到發哥未？

周潤發呢D咁貼地嘅神級明星真係好少見。成立慈善基金會承諾將56億財產全數捐出，平日自己都會搭巴士、搭地鐵，撞到發哥想影張相都有求必應，真係毫無架子。發哥夫婦做慈善咁多年，一直支持弱勢群體，發嫂做起慈善都一樣落手落腳！又恩愛又有善心，係真正嘅模範夫婦呀！

image source:Facebook/面包娛樂頭條

03 黎明？善心嘅外圍係善心嘅內圍

成日爆金句嘅黎天王係首位華人聯合國兒童基金會國際愛心大使，成立嘅聯合國香港委員會籌得巨額善款，係而且係公益金多年嘅代言人。咁多年黎做嘅善事真係數唔晒。不過天王都係好有性格嘅，被爆曾經係飛機上拒絕捐錢，天王就話做善事係自發性，唔應該比人逼去做。嗱！又醒多句金句比大家用喇。

image source:香港演藝人協會

02 華仔人善天不欺

劉德華係「香港十大傑出青年」、「世界十大傑出青年」，一直保持健康形象，雖然之前隱瞞已婚令唔少歌迷失望，但係係做慈善方面華仔都好誠實嘅。

「劉德華慈善基金會」1994年成立累積行善多到數唔晒，有咩天災人禍，捐錢都毫不手軟㗎。

image source:Facebook/劉德華我們的驕傲

01 普通話唔好唔緊要 愛心搭夠

古天樂係聯合國兒童基金會香港委員會大使，曾經向受災地區捐出2000萬美金緊急援助物資，透過「慈恩基金會」捐助資金，起咗97間小學嘅教學大樓同宿舍，仲有大大小小嘅利民設施。呢D事都係由身邊朋友爆出黎，古仔演技出眾，但做起善事就好低調，恭喜晒古仔攞埋第十六屆世界傑出華人獎，真係當之無愧！

image source:Facebook/古天樂 Louis Koo望到古天樂係第一名我就安心喇！

今時今日有佢哋真係好啊！慈善冇分大小，只要有心其實人人都可以係慈善家，我哋都應該向佢哋多多學習，學霆鋒話齋參與慈善從小做起，咁先係最佳典範吖嘛！

分析說明：

本研究資料分析時間範圍為2018年03月19日至2019年03月18日，共一年。

網路大數據系統觀測港澳地區上萬個網站頻道，包括新聞頻道、Facebook、Instagram、Twitter及各大討論區、部落格等，針對討論『娛樂圈好人好事嘅藝人』相關文本進行分析，並根據網友就該議題之討論，作為本分析依據。

本文分析之結果，非參考投票、民調、網路問卷等資料，名次僅代表網路討論聲量大小，不代表網友正負評價。