傳安德尊背住拍拖20年女友撻著宋芝齡？ 女方斬纜：我哋梗係無可能啦

今個月19日就踏入60歲的「大王」安德尊，多年來都低調處理感情生活，不過大家就知他一直收埋一個拍拖20年的女助手女友，年初大王作客車淑梅的電台節目《舊日的足跡》更被問到幾時結婚！不過近日大王竟然被影到同宋芝齡撓手現身街頭，仲頭貼頭傾計勁親密，未知女友有何感受！

42歲中韓混血兒宋芝齡，1996年參加港姐入行，近年主要為節目《都市閒情》及《流行都市》做主持，跟大王老友鬼鬼，二人在鏡頭前不時鬥氣，鏡頭後同樣感情極好，有指之前芝齡近2年回復單身令大王鼓起勇氣作出追求。

對於拍拖一事，宋芝齡回應時笑言今日才知道自己拍拖，又解釋自己跟大王關係良好，平時在電視城都會撓手行，有時更會拖手。被影到街頭拍拖當日其實是要去拍外景，架車泊遠了而跟大王同行，再順道買炸雞跟同事享用。宋芝齡更指「緋聞」新聞証明了二人很成功，又笑指好開心自己可以取代李錦聯，更直接斬纜強調跟大王無可能發展，透露自己現時未有追求者。