唔少港人周末就會返深圳食好西或者去按摩，不過內地電子錢包盛行，拎住人民幣現鈔都好唔方便，就算係銀聯卡都唔一定好用過WeChat Pay，早前中銀香港宣布中銀客戶可以喺香港分行辦理內地戶口，方便港人綁定手機銀行，唔使返內地都搞到，實際上係咪咁簡單？有乜要特別留意呢？
開戶口真係唔需要地址證明？
無錯。要開一個「大灣區開戶易」帳戶，你只需要準備香港永久居民身分證、回鄉證，以及實名登記嘅內地手機號碼。
2. 內地手機號碼一定要本人登記？點辦理？
自從內地號碼實施實名制之後，香港已經幾乎買唔到內地號碼儲值卡，大家可以選擇喺香港電訊商購買內地號碼月費計劃，或者有機會返內地辦理月費會更加平。銀行職員建議手機號碼係申請人登記，不過記者實測唔係本人都可以成功辦理，但一定要確認內地手機號碼喺香港能夠接收短訊（SMS）。
3. 有齊資料係咪即開即刻用得？
唔係。其實香港中銀只係負責幫你填妥開辦「大灣區開戶易」帳戶申請表，只係進行申請，之後用戶需要等約2星期，等內地中銀審核及申請，之後用戶會收到一個短訊，通知你能否成功開戶。
之後用戶需要在60日內到提交申請嘅香港分行進行啟動帳戶手續，記得帶香港身分證、回鄉證及實名登記嘅內地手機號碼（準備綁定）。
4. 申請成功係咪代表可以自由將香港中銀人民幣帳戶嘅錢轉帳入內地帳戶？
唔係。基本上兩個係獨立戶口，要存錢入內地帳戶需要透過匯款方式進行，可以利用櫃位或透過中銀手機程式內「中銀快匯」進行匯款，任何一個方法都會收取手續費，但6月30日前透過手機銀行匯款手續費將會豁免。
5. 大灣區帳戶特別注意事項？
呢個屬於II類帳戶，雖然申請成功用戶會收到一張ATM卡，但只適用於內地中國銀行，而且呢個帳戶並不支持網上銀行或手機銀行服務，換言之佢冇辦法喺香港主動做任何轉帳、提存，要查詢存款或交易紀錄只能夠透過微信綁定中銀官方帳戶。
另外每日消費、轉帳、轉入或存入資金限額係人民幣10,000元，櫃員機提款額就係人民幣1,000元，如果帳戶餘額少過人民幣300元，將會被收取每季人民幣3元手續費，半年內無交易帳戶有可能被註銷。
6. 做好晒手續係咪即刻可以用WeChat Pay？
以上只係開通內地戶口同綁定中銀微銀行，要正式用內地WeChat Pay，用戶需要自行將手機WeChat錢包轉錢包地區為內地，再綁定銀行卡，之後就可以為WeChat Pay充值或直接扣帳。
簡單嚟講，整個申請程序唔算繁複，只係需要比較長時間，好多人以為準備好三樣嘢就可以即刻開戶，並擁有同香港中銀帳戶相同服務，實際上呢個帳戶有一定限制，如果你只需要好似WeChat Pay呢類簡單消費用，開呢個帳戶係方便；但如果需要更全面嘅服務，銀行職員都鼓勵客戶直接返內地辦理。
攝影及撰文：沙拉
