香港、新加坡長久以來都係金融市場上嘅競爭對手，但可能礙於大家都有返咁上下江湖地位，為免國際金融機構難做，都好少可互相打臉，嚟一個埋身肉搏。不過，今時今日已唔同講法，香港今年10月31日至11月4日搞「金融科技周」Hong Kong Fin-Tech Week，新加坡就喺11月2日至4日搞「金融科技節」Singapore Fin-Tech Festival。時間，重疊；主題，一樣。
你可能會話係咪咁岩？實情係睇返過往資料，星港都有不明文嘅默契，就係就算兩個event日子幾近都好，最緊要唔！好！撞！期！等一班Banker 可以一個trip去齊星港兩個大活動。但今次新加坡揀呢個日子，算係打破以往嘅慣例，擺明車馬搶客。通常有咩情況下，你唔使俾面你對手？就係你知道你sure win！
冇計，兩地防疫政策相差太遠，新加坡早就「與病毒共存」，入境有冇打針都好，一律免隔離；除咗公共交通工具及醫療場所，其他地方都唔使戴口罩；至於香港呢？口罩唔在講，入境又要打齊針，又要隔離隔3日，3日之後都未算完全「放監」，另外4日好多地方唔去得唔做得。
防疫政策下，香港人才流失已成定局。政策尚未放寬，特首李家超就已聲言「香港一定會搶人才」，搶人嘅條件未見；但望返過去星洲，竟一反近年收緊外勞政策，突擊推出海外網絡和專業簽證（ONE），可以話係「趁你病攞你人」。
目前香港防疫政策已明顯進退失據，連唐英年都開聲話「搞內循環等於內出血」，吳光正話香港「已失去國際中心（Asia’s World City）之實」。就算11月政府因為Fin-Tech Week、七人欖球賽放寬去到0+7，咁即係你叫個banker山長水遠嚟香港，佢係連酒店餐廳都唔入得？人哋同你講thanks but no thanks 都係人之常情，因為喺佢個世界，一早已忘記covid。去到香港，你要佢同你一齊如臨大敵，are you kidding？去新加坡開完會，吃喝玩樂唔好咩？
正所謂，冇期望就冇失望。有政圈中人話，今次政府對Fin-Tech Week期望好高，佢哋相信：話晒都係接近3年嚟香港盛事Re-opening 第一炮喎！其實如果港府仲抱住「香港點計都係亞洲金融中心，搞得大event，全世界一定要仆到嚟啦」、「0+7唔使你隔離都皇恩浩蕩啦」嘅諗法，就未免太有自信。喺令人炆陣防疫政策，再加上星洲窮追猛打下，應該做好期望管理，唔好預會星光熠熠，有人肯用3日隔離到一到香港個Fin-Tech Week，再飛新加坡都算認真比面啦。然後睇一睇香港Fin-Tech Week演講名單，40個講者，有八成係locate香港。
再講，現時部分防疫措施尷尷尬尬，好似近日大家開始討論，點解無打針內地客來港，可以有臨時疫苗通行證，之後政府就話要攞走內地客呢粒「魚蛋」，考慮統一要求。其實呢個根本係一個偽命題，與其「魚蛋論」地「我冇佢都唔可以有」，變相收緊措施；倒不如集中討論，如何可以安全地一齊放寬。不過防疫條例都有一樣令人喜出望外嘅地方，就係上述臨時疫苗通行證安排，適用人士除咗係內地客外，仲包括澳門、及台灣入境人士，即是話，香港就算連防疫條例，都充分體現一個中國原則，叻過淘寶！嘻嘻！
註：本網頁所有專欄作者的觀點，不代表本網立場。
Fortune Insight 聯乘 《華爾街日報》推出全新訂閱計劃「FI Prime Plus」，只需WSJ官網原價三分一價錢，即可同時暢讀《華爾街日報》全網內容和Fortune Insight大部份收費內容
按此訂閱：https://prime.fortuneinsight.com/web/wsj
Subscribe FORTUNE INSIGHT Telegram:
http://bit.ly/2M63TRO
Subscribe FORTUNE INSIGHT YouTube channel:
http://bit.ly/2FgJTen