明記腸粉係上水區嘅人氣名物，已開店數十年嘅老字號一直保留舊面貌，翠綠花紋地磚、摺枱膠凳，以搪瓷花紋碟盛着腸粉上桌，淋上醬料、芝麻，如此腸粉店香港所剩無幾。
店家早前貼出結業告示，4 月 9 日將會係最後營業日，唔少街坊熟客都慨嘆可惜。但同時有部分客人喺網上留下負評，結果老闆發佈長文，寫下工作嘅辛酸，例如 4am 企到 7pm 先有得坐低食飯、畀客鬧、被員工偷錢等等，同時老闆又好有性格地表示，如果有人能捱過佢嘅以上辛酸，佢願意奉上曾有客人提出 6 位數字想購買嘅豉油配方！
廣告（請繼續閱讀本文）
撇除所有網上嘅 drama，地道平價嘅平民小食，加上懷舊嘅風味，的確係唔少人嘅老香港回憶。店內食物款式很簡單，腸粉、魚蛋、豬皮、燒賣，另有三款其他食物，皮蛋鹹蛋瘦肉粥、老火白粥、豉油皇炒麵。當然腸粉先係重點，口感滑溜，記得試埋豉油，微鹹帶有少許甜味。
廣告（請繼續閱讀本文）
地址：上水新康街 11 號地下
營業時間：7am-5pm，星期一休息