廖孖記惡人先告狀 東張西望持「正義」之名偏頗報道 害人終害己

1.近日本港最大新聞，莫過於廖孖記 陷食安風波，其腐乳早前被食安中心驗出含菌量超標 12 倍，「腐乳風暴」 吹襲多日，終自爆原來多年來腐乳都搵內地廠代工

2. 今早第四代傳人廖晃業自爆，30年前已經無喺香港再生產「生腐乳」，並由一個內地供應商購入「生腐乳」，再在本港廠房發酵，引來全港市民怒吼：「四代祖傳，原來只係攞返嚟入樽」，有違反商品說明條例之嫌

3. 事件最大的轉捩點，就係食安中心出報告後，廖孖記負責人廖太主動聯絡《東張西望》，喺節目中聲淚俱下「伸冤」，成功令大眾視線由農夫山泉轉到廖孖記

4. 廖太喺節目中提到：「你（食安中心）特登攞嗰支嚟買，你係咪特登係針對我呢？你嚟到我店舖話畀我知，重新攞我嘅貨品，咁點解你唔用番我個貨品去做檢測呢、做標準呢？當時我有反對㗎，但係佢哋係冇聽過」。

5. 廖太又指，有顧客甚至拿已過期的貨品來要求換貨，電話響個不停，令廖太有很大心理壓力，令她一家人心情不佳、寢食不安和失眠，最後家中長輩因受壓力決定結業

6. 要知道近年不少香港老店來租金及各種問題結業，集體回憶情懷濃厚下，《 東張西望》訪問一出，即引來全城關注，更有指食安中心陷廖孖記於不義，直斥「農夫山泉下跪，卻迫死廖孖記」。（編按：食安中心及消委會為兩個部門）

7. 但食安中心向傳媒稱，廖孖記「廠內沒有進行腐乳生產」，「只進行白腐乳重新裝瓶、添加調味料等」，而包裝區衞生亦未如理想，似乎早有知道事件端倪。而廖晃業則回應指：「呢個係香港腐乳界多年嘅魔術、秘密」

8. 隨事件發展，陸續傳出廖孖記腐乳根本非香港製造消息，更有網民從網上圖片看到，多年前舖頭已經常擺放印有簡體字「特级2磅白腐乳」紙皮箱，令人懷疑店舖用未加工白腐乳再加工，至今日廖氏一家知道難以再隱藏，終於要自爆

9. 廖孖記是否多年來出賣港人，已呼之欲出，娛頭今次所講，《東張西望》再再再一次「報道」失實

10. 娛頭翻查東張西望訪問相關影片，點擊率已逾15萬次，訪問一開始，由廖太連珠發炮「一夜之間，完全是掉進地獄」、「害我名聲掃地」，之後女主持大大聲地說「吓！百年老字號，食咗咁耐，依家先出事？」O嘴、驚嘆表情盡出，片中更不斷向廖太「掃背」安撫，嘩眾取寵

11. 至今事件真相大白後，有網民湧到該片段留言，包括「你哋都呃咗香港人幾廿年啦」、「東張西望不要隨便報道 ，應該跟進調查真相」、「嘩這女人（主持）第幾期嘅藝員訓練班㗎…咁好戲嘅」、「不是大聲就有理」、「《東張》報道偏頗， 曾志偉出來道歉！」

12. 事實上，《東張西望》掛正義之辭，標榜「有咩事報東張」自居，收視長期佔據TVB首三名，但其「報道」已不是第一次出事

13. 好似今年6月，通訊局指節目去年11月播出有關某品牌氣體煮食爐強化玻璃碎裂的報道，多次清楚顯示該品牌，損害該品牌聲譽﹐惟沒有給予該品牌回應構成不公平，內容涉及偏頗誤導，裁定違反守則，向其發出警告

14. 而今年1月，報導一名狗主批評醫療中心的專業表現，但未有予受批評一方適當機會和及時回應，而其中一段言論誤導觀眾，以為中心的醫療服務普遍收費高昂，對中心構成不公，已發警告信

15. 但每次出事後，節目都未見有任何改善，偏頗、煽情、「幫住投訴者」情況咁耐以嚟都冇改變，多次警告猶如無牙老虎

16. 《東張西望》節目本身定為綜合資訊娛樂節目，同新聞完全冇關，唔受相關條例規管，而節目因為善於用「新聞報道」形式包裝，加上兩位「主播」「為民請命」式「報道」，唔少香港師奶都當新聞睇，「睇乜信乜」；而節目因為有大量植入式廣告，又多fans，喺TVB財赤下，投訴極都無有怕

17. 今次《東張西望》又再「歸錯邊」，似乎會繼續冷處理，播多幾次新何太咪當乜事都冇，反正有咩觀眾，就有咩節目，求真精神，值得幾多錢？

▼Follow 娛頭
Facebook: https://www.facebook.com/profile.php?id=61554772610166