與郭思琳今註冊結婚！吳浩康緊張至失眠：演練時已經喊咗

38歲吳浩康（Deep）與35歲郭思琳（Margiela）早前宣佈雙喜臨門，今日（3月15日）下午兩人正式註冊。Deep透露，婚禮前兩晚已經緊張到睡不著，向來眼淺的他更在綵排時哭出來。

Deep表示這兩日緊張得一早起身：「朝早起身去睇set up，企喺度諗要講啲乜嘢？有邊個會嚟？要多謝邊一位？瞓唔到，兩日都五點幾、六點就醒咗，所以都幾攰同幾緊張。朝早自己演練嘅時候已經喊咗。」

Deep大讚老婆郭思琳性格及孝心，「我鍾意太太係一個好率直、好簡單嘅人，有乜就講乜，同佢相處唔駛估，係好嚮往同佢相處。佢唔止對父母好上心、好愛錫，對其他屋企人都好關心好照顧，好欣賞佢對家庭呢個態度。」

Deep笑言剛學會新婚的第一課，就是不給太太評分：「俾太太幾多分都唔夠喎，唔可以亂咁俾分，呢個係我啱啱新婚學識嘅事，所以太太一定係超過滿分㗎啦。」

升為新婚「人夫」，Deep坦言心態要再重新調整自己，很多事情需要重新學習，「無論係相處、對事件嘅睇法、價值觀都唔同咗，所以而家變得謙卑咗。過往當大家溝通有問題嘅時候，會覺得，『喂！你唔明白我』、『我係啱嘅』、『我識呢件事，你應該要聽我講』而家會調番轉，『可能有啲嘢我唔知呢』、『可能我未識呢』、『可能我唔了解呢』，我都需要重新去學過，希望可以幫到個關係。」