編按: 香港跑手林穎璋 (Vincent)，星期日在日本舉行福岡國際馬拉松跑出2:15:31，刷新香港紀錄；以下為 Vincent 破紀錄後感受:
今次好開心可以嚟到日本福岡，同亞洲區最高水平嘅選手一同競技，今次能夠破到香港紀錄做到呢個時間，對我嘅意義好大，雖然做唔到我預期比較高嘅目標，我都畀我自己今次嘅成績 120分。
為咗今次比賽我準備咗大半年嘅時間，好專心為咗呢場賽事做足準備，過程係幾辛苦，尤其係我一路以嚟都係一個人練，無一個實體嘅教練或者隊友，所以今日做到呢個成績我都好滿意。
去到十公里，甩咗同自己一齊跑嘅集團，無人同我一齊跑，都有啲孤獨感，但係我決定就算一個人跑都要繼續向前，先至有今日呢個成績。
我想講嘅嘢係，對於準備馬拉松嘅選手嚟講，雖然香港嘅訓練環境未必非常理想，尤其係夏天天氣方面，但係我都可以做到今日嘅成績，我想鼓勵其他香港運動員都可以做到。
好感謝我嘅品牌贊助同經理人 Nick 可以令我無後顧之憂咁去專心訓練，仲有我嘅屋企人，一路以嚟我決定做全職運動員，雖然唔會搵到好多錢，但係都好義無反顧咁支持我，可以畀我專心去做我自己做得最好嘅嘢，做到極致。
仲有就係我嘅教練 Rory ，雖然只係遙距教練，但係佢總能夠就住香港嘅環境訓練，畀最好嘅 program 我，可以發揮到我最大嘅 potential，我好期待以後可以同 Rory 一齊 Achieve 到更多。Rory, you are the Real Man!
宜家最想食燒肉，好好休息。嚟緊最大嘅目標係下年嘅亞洲馬拉松錦標賽，希望可以再次入選代表香港隊參賽。我希望嚟緊可以跑入 2:10 嘅世界，係一個好重要嘅里程碑，因為代表左香港運動員可以真正同亞洲其他國家或地區如日本、中國、台灣睇齊。
訪問提供: Puma
The post 福岡國際馬拉松 2:15:31 破香港全馬紀錄 | 林穎璋: 我畀自己120分 appeared first on Fitz 運動平台.