金像獎｜余香凝再憑《白日之下》膺女主角獎 成四料影后

余香凝繼「香港電影評論學會大獎」、「香港電影導演會年度大獎」及「香港網絡影評人HIGHLIGHT大獎」，再憑《白日之下》在今晚（14日）舉行的「第四十二屆香港電影金像獎」奪得「最佳女主角」，成為四料影后。

她從鄭秀文（Sammi）手中接過獎座後致辭︰「感謝天主，多謝香港電影金像獎，多謝投票畀我嘅人。我可以企喺度，係因為我特別幸運﹗我要多謝古天樂先生願意投資呢一部咁有意義嘅電影，多謝爾冬陞先生，我要多謝《白日之下》台前幕後每一位，特別係每一位演員，同埋大家經常忽略嘅特約演員，佢哋都做得好好。我要多謝兩位記者，希望可以做到你哋記者精神。」

余香凝接着多謝家人︰「我要多謝我屋企人，我媽咪，永遠喺我最失意嘅時候，我媽咪係我最大嘅動力。多謝我先生，我老公，冇你嘅支持，我乜嘢都做唔到。多謝你，我讀劇本、casting，你都陪我。我知你好攰，但係你夜晚都會陪我對劇本。多謝我兩個小朋友﹗媽咪我有我嘅夢想，而我不停喺度追緊夢，我希望你哋都會有你哋嘅夢想。」

她最後說︰「我會用我一生嘅時間，去鑽研點樣做一個更好更好嘅演員。作為一個女性，無論喺人生邊個階段，我哋都可以努力去追求夢想。」

（即時娛樂）