湯怡請全職員工待遇惹爭議　親自解畫否認離地：我都係打工仔！

藝人湯怡早前為經營的餅店就請全職員工問題跟網民掀起爭議，今天（23日）她出席早餐品牌推廣活動時，就事件表示：「我冇激氣，可能係文字上嘅表達，冇語氣嘅問題所致，我唔係咁嘅意思，下次我應該拍片。（請到人未？）我有好多Part Time嘅，不過我依家有兩間餅店，年底想開到四間，所以先想請全職啫，可能依家啲年青人返工想彈性啲，想做吓呢樣又試吓嗰樣。（可會降低要求？）大家商量吓啦，睇吓佢哋想要乜，大家夾吓時間啦。」

身為餅店老闆的她亦言自己明白員工心態，她說：「因為我都係打工仔，我都係英皇員工，都想多啲假又有糧出，但作生意人時，立場又唔同咗。」問老公麥秋成有何睇法？她指老公沒有刻意看網友留言，覺得有些事難控制，但老公相當窩心，本為西九騷排舞已很忙，每日朝十晚十開工，在她生日時，特地請一天假幫她慶生。

提及日前（17日）37歲生日，她一家三口簡單度過，她說：「只想食餐飯同一齊跑步，因工作忙，好耐冇跑步做運動，我只想出一身汗，最終跑咗20分鐘，因為囡囡太細個，都跑唔到。」

東網網站 : https://on.cc/東網Facebook專頁 : https://www.facebook.com/onccnews/