內地科技股呢舖「洗白白」都應該算係史上最甘的一次。好似隻快手(01024)，2月以招股價115元上市，炒到上高位417.8元，如今撻落低位僅64.5元。筆者都好疑惑，在監管窮追猛打之下，以目前公司的估值仍高達2,900億元，股價如何支撐，何處是底！
雖然，因今次科技股災而損手的散戶不少，但筆者相信，今次基金大戶受重傷的都為數亦不少，尤其是幾隻大型科技股佔指數一定比重，跟指數比重投資的基本上要硬食呢輪跌浪。恐怕呢個第三季，打工仔除非好醒目咁坐重晒美股基金，否則持有中港基金，十居其九組合資產價值唔見一截，惟有安慰自己係長線投資，要用平均成本法看待。
廣告（請繼續閱讀本文）
事實上，筆者在7月中旬的文章已預告，今次科技股劈價潮仲有排捱，叫大家只有避開政策市，而不能對着幹，有聽忠告的應該可以慳唔少。到如今科技股已經跌咗咁多，又有唔少股民不甘心，問到底撈得貨未？
呢個問題，其實筆者早在3月上旬的文章亦略有分析。今次科技股失寵，想翻身，至少要見到3個條件。首先係幾隻龍頭科技股要確認止跌回穩，但呢一刻暫時未見到；其次是北水要重新活躍南來，呢一刻亦未見到；第三係再有大型科技類IPO成功啟動集資，呢一刻都見唔到。故總括而言，筆者相信，年底前呢3大條件都無望實現，看官宜繼續隔岸觀火，別老是與錢有仇，想冒險去接飛刀！
東網產經專欄作者 帥哥
廣告（請繼續閱讀本文）
東網網站 : https://on.cc/東網Facebook專頁 : https://www.facebook.com/onccnews/