早前網絡瘋傳一段短片，一杯望落係普通茶記的奶茶，點知可以用刀切開一分為二！原來佢係一個由兩位香港甜品師設計出來嘅造型蛋糕，而呢種「幻覺蛋糕（Illusion Cake）」喺外國一向盛行，顧名思義，就係要令你產生幻覺，以為佢係另一種物品，以反差感帶來強烈視覺衝擊。CONY為大家介紹4位甜品造型師IG，等大家可以更投入疑幻似真嘅甜品造型世界！
1. @dearharley_
剛剛提及嘅茶記奶茶蛋糕就係「Dear Harley Cake Studio」嘅作品。呢間甜品店係由2位香港90後女生創立，雖然本地有唔少翻糖造型蛋糕店，但主打幻覺蛋糕嘅佢哋都算係第一間。除咗奶茶，佢哋仲製作出不同本土元素嘅蛋糕，如叉燒飯、竹籠燒賣、舊式信箱、譚仔米線等，全部造型都相當逼真。由於製作幻覺蛋糕手工繁複花時，因此蛋糕價錢最平由$1,500起。不過就算有冇budget訂嚟食都好，齋睇都教人會心微笑。
2. @idolcidigulliver
意大利甜品造型師Matteo Stucchi同樣係90後，雖然佢冇用到翻糖製作蛋糕營造幻覺，但就用上各種微型人偶、模型，配合甜點嘅特色、造型幻化出不同有趣場景，例如用吊臂車將車厘子放上蛋糕；用入油機為意大利脆卷注入忌廉；攀石好手在蛋糕上攀岩等。睇見佢每一幅作品覺得盞鬼有趣之餘，仲不得不佩服佢嘅想像力！
3. @the_bakeking
講返造型逼真嘅幻覺蛋糕，不得不follow呢位曾獲獎無數嘅Ben Cullen甜品造型師。佢嘅風格大膽，模仿all day breakfast、生雞柳、血淋淋腦袋等，設計出各種逼真蛋糕，但同時佢又會製作可愛嘅海綿寶寶、牛奶盒、茄汁豆罐頭等造型蛋糕，不拘一格。如果大家想了解更多關於佢嘅創作，仲可以上Netflix睇《Extreme Cake Makers》。
4. @paladarte
除咗將成個蛋糕化成另一件物件，又有冇諗過將成個自然景觀搬到蛋糕之上？蛋糕造型師El Salvador一向擅長做各種精緻翻糖蛋糕，而早前佢更將浩翰海洋、島嶼等景觀作為蛋糕主題，以藍色漸層啫喱當作海洋，再仔細地勾勒海底、懸崖、山林、小艇等細節，將宏偉景觀完美縮小，變成令人嘆為觀止嘅蛋糕造型。
