早已全身投入國內市場的陳小春，孖住大仔 Jasper拍過兩季內地親子騷《爸爸去哪兒》，之後再拍《想想辦法吧！爸爸》，父子檔搵錢都未夠，今年5月底細仔 Hoho出世不久，即全家北上拍攝內地真人騷節目《新生日記2 》。為賺盡人仔唔怕疫情，陳小春與應釆兒除了兩個寶貝仔，連剖腹生產片段都可以賣，為賺人仔，陳氏一家真係去到好盡！
撰文、圖片：東方新地
陳小春、應釆兒被指見錢開眼
在大仔 Jasper四歲前，陳小春與應釆兒一直好保護兒子，甚少讓他曝光，直到湖南衛視重金禮聘兩父子參演內地親子真人騷《爸爸去哪兒5 》，有傳當時小春被高達2,500萬人仔酬勞打動，拍攝三個月Jasper雖吃盡苦頭，不過人氣一時無兩，成為節目中的小暖男。
之後應釆兒落閘表示拍完《爸爸5 》會讓 Jasper專心學業，點知言猶在耳《爸爸6 》開錄，小春又再帶著 Jasper現身，再被指見錢開眼。近年幾乎全年無休都在國內開工的小春，深知一家同框的賺錢能力比兩父子更勁，今年受到疫情影響，大部分香港藝人都暫停中港兩邊走，小春與應釆兒卻無有怕，一於全家出動賺到最盡。
一家四口收天價賣生仔過程
今年5月底細仔 Hoho出世，小春請大假返港陪應釆兒入院生仔，到8月底細仔滿一百日，即舉家返國內為內地真人騷節目《新生日記2 》拍攝，冒住高風險都要帶埋初生細仔北上，真係好博。據知情者透露：「小春同應釆兒一知道有第二胎，已經同國內電視台斟好，由大肚開始拍攝，到細仔出世就一家四口出鏡，酬勞真係天價。為咗照顧細仔，應釆兒長居台灣嘅父母都隨行，名副其實全家總動員。依家疫情仲未完全控制到，你估小春真係唔驚？你見個真人騷幾乎都係拍屋入面嘅生活，佢都唔敢帶兩個仔出街周圍走，每次有攝製隊入屋，佢哋都好緊張同做晒防疫準備。」
人仔如此吸引，應釆兒在真人騷中不惜公開剖腹生產片段，就連細仔Hoho的處男出浴都獻出，再加上兩兄弟的溫馨互動，以及應釆兒虎媽上身教仔，全部都係睇錢份上。