【體路專欄】海鷗飛不起，總有佢道理。白禮頓今季英超表現浮浮沉沉，並唔係無原因。領隊樸達上任後積極求變，球隊比起以往更敢於喺後場透過地面組織策動進攻，不過，理想同現實往往係兩碼子嘅事，究竟係樸達希望實踐自己足球理念嚟設定球隊戰術，定係因應球員嘅能力，因人施陣嚟設定球隊戰術？絕對值得大家諗一諗。
陣式多變動 球員難集中
要數到白禮頓今季其中一個特點，當然係每場比賽嘅陣式都出入，甚至乎踢踢下比賽中途都會變陣。樸達要排出3人或4人防線，完全取決於佢將丹般擺喺左中堅定左後衛。陣式能夠靈活轉換本來係好事，但就算球員對唔同戰術幾熟練都好，落到場始終要因應當日自己、隊友同對手表現以至心理狀況作出調整，畢竟人唔係機械人，球隊進攻靈魂人物托沙同中場發電機梅爾較受變陣而影響佢哋發揮。托沙習慣踢左翼位置，喺左路向中間內切策動攻勢，若排出3人防線會移前踢前鋒，身型較單薄嘅佢難以抵擋後衛強大衝撞力；至於梅爾最理想係進攻中場，需要較大活動空間創造進攻機會，有時候因應陣式同戰術關係需要改踢左右翼，暴露咗佢突破能力較低及上落頻率較少嘅一面。
球員能力要認清 場上踢法要醒定
海鷗兵團現階段比起前領隊曉頓帶領嘅時候踼得更悅目，再唔係傳統英式踢法高Q大腳，不過，好睇還好睇，實唔實際就另一個講法。後防上登克、韋士打同丹般都係用波能力較強，中前場亦有哥斯、梅爾、托沙等。然而，最大問題就係連接兩者之間嘅橋樑—防守中場！呢個位置上有史提芬斯、普柏同比素馬，如果要講到用波能力，普柏會係最好嗰個，但有留意開白禮頓比賽嘅球迷，就會知道喺呢個位置上周不時都會出事，周不時都會送下禮（可參考圖6）。因此，若然要堅持由後場組織嘅法，個人認為4-2-3-1陣式會係最啱白禮頓，每個位置亦有適合人選競爭同輪換。
https://www.sportsroad.hk/wp-content/uploads/2020/07/rioleung_column_20200701_06.mp4
．後場大意交失波或者被對方迫失，對白禮頓今季嚟講真係老是常出現。
https://www.sportsroad.hk/wp-content/uploads/2020/07/rioleung_column_20200701_07.mp4
．面對對手高強度逼搶，後防都會堅持嘗試搓返個波出嚟。
場上表現同成績反映一切，球隊季內多次轉換陣式令球員難以適應，堅定不移嘅踢法有時候令球隊吃盡苦頭，樸達真係要喺現實同夢想之間作出一定嘅取捨，水深火熱嘅情況下都要搵出最佳搶分方案。下季仲可唔可以留喺英超比賽，就好睇下一場能唔能夠擊敗護級競爭對手諾域治，拎多3分，上岸機會就大大提升。
《體路Sportsroad》
屬於香港人的體育新聞平台
Facebook: https://www.facebook.com/Sportsroad/
Instagram: https://www.instagram.com/sportsroad.hk/