盤點21位傳統名校畢業港姐

一年一度嘅選美盛會「香港小姐競選」即將舉行，今年入圍嘅港姐邊個最啱你心水呢？其實唔少選港姐入行嘅藝人，都係名校出身㗎，雖然唔係個個都係女狀元，但係都有自己嘅成就！

撰文：Sunday Kiss｜圖片來源：陳曉華Instagram，馮盈盈Instagram，新傳媒資料室，節目截圖

盤點21位傳統名校畢業港姐

真光女書院

陳曉華（2018年 – 冠軍）

陳曉華於位於油麻地的真光女書院畢業，阿G.E.M.鄧紫棋亦是該校校友，在第二屆中學文憑試中，真光女書院亦出了一名女狀元！陳曉華2013年入讀香港中文大學醫學院那打素護理學院，並於2016至2017學年第一學期因其學業成績優異而獲頒發「鄭棟材獎學金」，而陳曉華今年除了當選港姐冠軍外，亦獲頒發註冊護士證明書，成位一名註冊護士。

港島中學

雷莊𠒇（2017年 – 冠軍）

2017年度香港小姐冠軍雷莊𠒇，雖然喺加拿大出世，但係7歲就回流香港，曾經就讀法國國際學校同港島中學。港島中學建校超過半個世紀，末代港督彭定康嘅細女彭雅思，仲有港產王妃文雅麗，都同雷莊𠒇一樣，係呢間國際學校嘅校友。

雷莊𠒇後來入讀多倫多大學，主修僱傭關係，副修英文寫作修辭及法文。雖然以選美入行，但對娛樂圈亦毫不留戀，出席早前已公開宣佈話自己卸任後，就會返回加拿大生活及尋求工作機會，決心離開香港。

寶血會上智英文書院

馮盈盈（2016年 – 冠軍）

2016年度，由大熱的馮盈盈（Crystal）奪得后冠，Crystal畢業於香港大學食物及營養系就人人都知啦，原來佢都係讀地區名校㗎！Crystal中學時就讀深水埗寶血會上智英文書院，雖然就同名牌中學女拔嗰啲無得比，不過佢讀書都好叻，入到港大㗎！

寶血會上智英文書院是一間天主教女子中學，以英文為教學語言，其他校友包括歐陽妙芝及魏綺珊等。畢業後，入讀港大營養學系。真係美貌與智慧並重啦！

拔萃女書院

麥明詩（2015年 – 冠軍）

「狀元港姐」麥明詩除咗親身引證咗咩叫「美貌與智慧並重」之外，亦證明咗「女大十八變」都係堅㗎！唔明？下面嗰張就係麥明詩當年榮登女狀元嗰陣嘅訪問相啦！ 睇完會唔會明啲？

龐卓欣（2015年 – 亞軍）

2015年亞軍龐卓欣，都係女拔代表嚟㗎！同麥明詩一樣都係1991年出世，兩個仲係同學仔，畢業之後升讀美國曼哈頓音樂學院。喺名校Secrets仲有校友爆佢哋兩個原來係由細到鬥到大㗎！不過一世人流流長，呢round鬥完咪再鬥多round囉！一日未瞇埋眼都未知邊個先係最後勝利！

孫泳恩（1973年 – 冠軍）

女拔一次出兩個港姐，其實都唔叫最威！要數最威，梗係港姐史上嘅第一人啦！1973年，第一屆港姐冠軍孫泳恩，亦係女拔嘅畢業生！試問有咩犀利得過，創造咗一個冇人打得破嘅紀錄呀！

楊寶玲 （1987年 – 冠軍）

1987年嘅港姐 冠軍楊寶玲，喺女拔中學畢業之後，就去咗英國升學，返嚟再選 港姐 。佢當選之後，仲代表香港參加過兩大國際性選美活動，而且都攞到獎㗎！分別係世界小姐嘅「亞洲皇后」，同埋環球小姐嘅第五名。而家楊寶玲已息影，移居咗去美國，仲做埋媽媽添！

嘉諾撒聖瑪利書院

女拔出咗3個港姐 冠軍，係好厲害！不過另一間好低調嘅傳統名女校 – 嘉諾撒聖瑪利書院，其實都唔輸蝕㗎！咁多年嚟，出咗兩個 港姐 冠軍、一個季軍，仲有兩個最上鏡小姐，同一個視后，比起上嚟，一啲都唔遜色㗎！

郭羨妮 （1999年 – 冠軍）

郭羨妮喺港姐 史上都係一位具代表性嘅人物，本身係中英混血兒，喺聖瑪利一條龍由小學讀到上中學，之後去咗英國讀書，其後當選1999年香港小姐，同2000年國際華裔小姐冠軍，歷史性成為20世紀最後一位 港姐 ，同21世紀首位華姐，亦都係第二位同時獲得 港姐 同華姐冠軍嘅佳麗。

曹敏莉（2003年 – 冠軍）

平時談吐都好優雅嘅曹敏莉，唔止係當年嘅冠軍人馬，仲同時得到「國際親善小姐」、「鑽石肌膚獎」、「芙蓉美態獎」及「完美組合獎」，係「5料冠軍」嚟㗎！依家呢，就已經係3個小朋友嘅媽媽喇！

張可頤 （1994年 – 最具演藝潛質獎）

1993年，港姐新增咗個最具演藝潛質獎，不過只係搞咗兩屆，第一屆嘅得主係郭可盈，第二屆嘅得主就係張可頤，兩個選完美之後，都分別成為咗大台嘅當家花旦。畢業自聖瑪利嘅張可頤，仲喺2003年，榮登視后添！ 演藝成就比同屆嘅冠軍譚小環高得多!

黃瑩同張可頤唔止係同屆佳麗，亦都係同學仔，係當年嘅最上鏡小姐得主。選完美之後，佢就留喺大台做主持同拍劇，不過多數都係做配角，最令人難忘嘅，就係佢係古天樂至今唯一承認嘅女朋友，而家已經淡出娛樂圈。

吳忻熹（1998年 – 季軍）

本來叫做吳文忻嘅吳忻熹，係98年嘅港姐季軍，而當年嘅冠軍就係已經轉投商界發展嘅向海嵐。選得 港姐 ，個樣冇理由唔睇得，但係喺2006年，吳文忻就接受咗100萬嘅酬勞，成為咗香港首位整容明星代言人，只少進行過6次整容手術，至於整完之後有冇再靚咗，就等大家自己判斷喇!

樊亦敏（1991年 – 最上鏡小姐）

久聞聖瑪利校風純樸，好鼓勵學生參與社會服務，學生出名心地好。1991年嘅最上鏡小姐 – 樊亦敏，就具備哂聖瑪利學生嘅俠義心腸喇! 早年劉家輝師傅中風之後， 被妻兒置之不顧，又被助手扣起收入及存款，孤立無援之際，唯一伸出援手就係一個交情唔算深嘅樊亦敏。當街攔截遞傳票，搵義務律師，照顧飲食，做咁多嘢，只係出於一個義字。

嘉諾撒聖心書院

郭藹明（1991年 – 冠軍）

90年代，高學歷嘅港姐只屬少數，91年嘅冠軍得主郭藹明就係其中一位。佢擁有美國南加州大學機械工程學碩士學位，仲係美國太空總署嘅兼職見習工程師，後嚟番咗香港選美，贏咗就順理成章入咗娛樂圈，第一套拍嘅劇，就係神劇《大時代》，識咗老公劉青雲，就連美國太空總署嘅正式聘請都放棄埋，1998年，就正式成為劉太。呢個有姿色，有知識嘅影帝背後的女人，就係聖心嘅畢業生喇!

潘芝莉（1996年 – 亞軍）

潘芝莉喺聖心由小學讀到上中學，畢咗業就去咗考空姐，喺1996年就參選港姐，同屆冠軍係高頭大馬嘅李珊珊。潘芝莉喺大台都拍過幾年劇，可惜都未做過主角，99年提前解約淡出。而家佢已經嫁咗人，仲生咗一仔一女，移咗民去澳洲。

協恩中學

佘詩曼（1997年 – 季軍）

佘詩曼喺協恩讀完中六，就去咗瑞士讀酒店管理，1997年畢業返嚟香港就即刻去咗選港姐，當年嘅港姐冠軍同亞軍，翁嘉穗同李明慧因為掛住爭老公，對娛樂圈無心戀戰，所以攞季軍嘅佘詩曼一卸任就被大台力捧，出道以來，幾乎拍親劇都係女主角，由畀觀眾踩佢唔識做戲兼雞仔聲，到成為有收視保證嘅視后，足見呢個協恩妹既有耐力又有有實力。而家佘詩曼，已經係大中華地區最叫好叫座嘅女演員之一。

陳淑蘭 （1988年 – 亞軍）

而家改咗名叫陳道然嘅蘭子，係1988年嘅港姐亞軍，兼最上鏡小姐得主，同屆冠軍係李嘉欣；同年蘭子代表香港參加世界大學小姐競選，獲亞洲大學小姐榮譽。卸任之後，蘭子完全拋開 港姐 包袱，轉型成為喜劇演員，90年代拍咗唔少經典喜劇，好似《家有囍事》同《霸王花》系列等。

聖保祿中學

蔡思貝 （2013年 – 亞軍）

蔡思貝曾就讀傳統修女學校 – 聖保祿中學，不過13歲就去咗紐西蘭升學，所以自細已經好獨立，之後再去德國讀大學，講到一口流利嘅德文。蔡思貝同同屆冠軍陳凱琳一樣，受到大台力捧，一卸任就一劇接一劇，係新一代嘅花旦接班人。

劉倩婷（2009年 – 冠軍）

劉倩婷都係跑馬地聖保祿中學嘅校友，喺英國倫敦大學經濟系畢業，之後喺國際知名嘅投資銀行做過分析員。當選港姐之後，做過主持拍過劇，2013年嫁咗畀著名堪輿學家李丞責，之後就以照顧家庭為理由，淡出娛樂圈。

瑪利諾修院學校

李嘉欣 （1988年 – 冠軍）

李嘉欣係中葡混血兒，亦係出咗名嘅大美人。選港姐之前，有傳李嘉欣係以2A（英文，聖經）7B 的會考成績，喺九龍塘瑪利諾畢業，成績一啲都唔失禮！出道以來，一直都係廣告商嘅寵兒，亦都拍過唔少大導演執導嘅電影。2008年，同商人許晉亨拉埋天窗，做咗豪門新抱；2011年，以41歲高齡生咗囝囝Jayden。

瑪利曼中學

李美鳳（1987年 – 亞軍）

當年有「電眼美人」之稱嘅李美鳳，曾經就讀灣仔名女校瑪利曼，不過15歲就移民咗去加拿大，直至大學畢業先返嚟香港選美，幾年間拍咗唔少劇集同電影，仲出過唱片。90年同林敏驄喺加拿大秘密註冊結婚，婚姻維持咗5年。96年改嫁鄭姓台商，生咗一對龍鳳胎，過住少奶奶生活。