《教束》最靈異嘅事件，發生喺最靈異嘅角色神婆身上：到底神婆梁家欣點解會鍾意狗榮呢？我諗連演神婆嘅盧蓁宜Claudia本人都未必知，只知道係神秘力量（編劇？）嘅安排。
問：你喺咩機緣之下參與《教束》嘅拍攝呢？
答：我家姐同埋兩個大學同學都send咗 ViuTV《教束》招募中學生演員嘅海報畀我。嗰陣我就啱啱拍完我第一套劇（按：《獅子山下2018》之《無愛之愛》，Claudia劇裡面飾演PTGF。），就安份守己咁讀咗書一陣，但心裡面係好想好想再拍戲，加上一套拍嘅《獅子山下2018》其實嗰個氣氛同埋style都比較陰沉啲，見到《教束》個海報就覺得呢個係一個好青春、好快樂嘅戲。同埋我自己都好想試吓做返中學生，所以我就去咗casting喇，最後send咗段片，又去咗見劇組嘅人。
問：神婆呢個角色除咗同你本人一樣講嘢咁細聲之外，仲有冇咩相同嘅地方？神婆成日介乎遊魂同現實之間，你覺得難唔難演呢？
答：我覺得神婆同我都幾相似，雖然我本人就有幾多面向，唔係好似神婆咁無時無刻都咁靜。我有時會活潑啲，唔會無時無刻都係一個樣。我將我安靜啲嘅一面，或者係比較缺乏自信嘅嗰個狀態，放大咗畀神婆。神婆佢係好想融入一班人，但係佢唔識得去溝通。佢咁相信超能力、占卜等，都係想用呢啲嘢去增加信心、用呢啲嘢去prove佢自己係啱嘅，佢甚至係用一啲星座嘅language去同人溝通，呢個係佢同人接觸時唯一識用嘅方法。我就將我日常裡面唔識得同一大班人相處時嘅嗰種狀態擺咗出嚟。喺呢個狀態裡面我就係一個人成日縮埋一角、好靜。
我都係一個好容易放空嘅人嚟，我會突然間個思緒就飄咗去第二度。咁嘅情形神婆都經常會發生，介乎遊魂同現實之間。但神婆同我會對周圍嘅環境都幾sensitive，有咩變動都好容易sense到。神婆雖然成日放空，但佢喺個group嘅dynamic有轉動嘅時候，會比好多反應出嚟。而佢都係一個好在乎佢在乎嘅人嘅一個人，套劇後面慢慢會睇到佢會好想幫佢班朋友。
我覺得唔係完全算難演。與其話難唔難演，不如話我好鍾意神婆呢個角色、好享受演呢個角色。
問：拍住 #程人富 （飾演狗榮）、 #鄧麗英 （飾演阿mo）呢兩個無論真人同角色都咁高能量嘅演員，你自己點處理先天設定已經係比較陰沉嘅神婆？同佢哋兩個做對手戲時，點樣拎平衡，好好展現個角色？
答：我覺得「不老騎士」每個人都有特色。如果話高能量同低能量呢，我同奇行種（ #余家溢 飾演）都係比較低能量啲，但係大家嘅角色都好鮮明，咁所以我冇乜特別去設定點樣去突出個角色，反而係好好地演嗰個角色時，我哋每個人嘅特點會互相映襯。我係低能量啲就映襯到佢哋嘅hyper、嗰種好飛快嘅交流。佢哋又同時映襯緊我一個比較暗沉、內斂少少嘅性格。係相得益彰咁去呈現出嚟。
問：有咩想同程人富講？有咩想同狗榮講？
答：我想多謝程人富喺成個拍攝嘅過程，甚至乎之後我哋成為咗朋友，都係非常之體貼、好照顧大家嘅一個人。佢好識得去炒熱氣氛，會好照顧每一個人嘅需要。可能我同阿Mo有時坐得低啲會走光呀，佢都會揼啲cushion畀我哋叫我哋小心啲。見到奇行種拍完啲喊戲佢有啲唔開心，程人富會去拍吓個膊頭，佢真係一個好善良同埋照顧大家嘅人，而且佢都係一個好努力同幽默嘅人。我記得放break嘅時候，佢成日都捉住我睇周星馳，會逐格去話畀我聽點解嗰度好笑。佢真係一個好專業而我好欣賞好欣賞嘅一個表演者。（按：非程人富廣告時間）
我想同狗榮講其實我真係好鍾意你，但係我自己都唔知點解。其實一開頭我覺得係命中注定，但慢慢之後相處落其實真係慢慢鍾意你。呀……係囉。（按：好~勉~強~）
問：劇裡面你最鍾意邊個情節？
答：我鍾意嗰個情節係未出現，係好遲先出現。點解鍾意係因為總結咗我神婆心裡面一件好重要嘅事，就係我嘅感情，我對狗榮嘅愛慕。喺嗰個情節裡面我係感覺到我被釋放呀，所以我都好期待呢個情節播出。
問：如果可以重拍一幕，你會揀邊一幕重拍？有咩做得唔好想改善？
答：我覺得最想改善嘅，係我應該多啲留意我拍緊嘅場口係喺邊集出現。因為去到拍咗十幾日嘅時候，有時我就唔係咁仔細去睇清楚演嘅嗰場戲嘅時空，冇諗過嗰時係我哋學生會組成之後幾耐。咁就導致咗有啲場口我present出嚟會同佢哋太過熟。譬如玩三國殺嗰個情節，我雖然係嬲奇行種玩得有啲蠢，但係我套返落神婆嘅時候，佢係一個慢熱嘅人，佢喺嗰個位未必會將佢嘅不滿擺晒上面，最多都係窒佢兩句。我覺得嗰陣嗰時個表情就略嫌不滿咗少少。
問：我記得你之前都有參演過港台嘅單元劇，想問你嘅演齡有幾耐？幾時開始做演員呢？依家係咪全力投入演戲當中？
答：嗰個節目係《獅子山下2018》之《無愛之愛》，係喺2017年拍嘅，係我演嘅第一套劇，所以我嘅演齡都係兩年左右。我中學時候都有玩drama，但都扔低咗好耐。因為一路以嚟我都係讀緊大學，忙住讀書，依家畢咗業，我又未去到話一定一定會行演戲呢一條路。但我都期待住我一步步行嘅時候，會explore到啲咩，去決定我未來嘅career，我自己都好期待將來會喺邊一方面努力。
但演戲真係一件我好鍾意嘅事嚟，我都有考慮過全力投入。如果以後繼續有機會演戲，去參與同埋講更多故事，我一定會加油努力。希望大家可以透過我嘅演繹，理解同埋喜愛更多人物，再從佢哋嘅故事，帶住溫度提煉出唔同嘅感受同埋視野。
問：有咩短期同長期目標？想有咩嘗試？嚟緊會喺邊度見到你嘅演出呢？
答：如果演戲係事業呢，我係冇乜長短期目標嘅。我一路都係有個劇本、有個故事我係好想講嘅，我就會去試。不過我暫時拍嘅角色同我靜嗰一邊都比較似，所以我都好想嘗試去做一啲好似頭先你講，比較高能量嘅角色。總之就同我之前演嘅有啲唔同嘅角色。
最近會見到我嘅演出，應該係嚟緊9月RTHK會播嘅連續劇叫做《萬輻瑪利亞》，我客串咗一集。嗰度都會見到莊子（#周漢寧）同鄧學謙（#唐浩然）嘅演出嘅，希望大家都留意吓啦。
撰文：方以文（ ig: @fongemantvman）
