《真情》相信係好多次7、8、90後嘅集體回憶，近排佢終於重播喇！好多粉絲都話要追返4年！處壞劇實真係陪住不少人成長，就等小編同大家盤點一下經典處境劇，你就算冇每集追過，但都必定聽過兼睇過！
經典處境劇1. 《卡拉屋企》
如果你係80後，相信對呢套處境劇都唔會陌生，以警察世家做主線，最吸引之處就係有上年攞咗終身成就獎嘅楚原，呢部亦係楚原第一部參與嘅電視劇，佢仲有份參與度對白，令到對白非常精警，另外亦有吳鎮宇、盧宛茵、鄭敬基、歐陽震華等演員坐陣，仲有美魔女李婉華，雖然淡出咗娛樂圈移民加拿大，但上年2018年佢都有回歸幕前，過吓戲癮，客串無綫重頭劇《再創世紀》。
經典處境劇2. 《真情》
《真情》呢套處境劇可以話係香港人嘅集體回憶，佢係香港史上播放時間第二長嘅電視劇，一個以三代同堂嘅家庭為背景，叉燒炳(劉丹)、善姨(李司棋) 等等你隨口都講得出嘅經典角色
但隨著有好姨 (家燕飾) 一家人嘅加入更加有狗血嘅劇情，當中以MayMay (馬蹄露飾) 嘅故事線最為人津津樂道
▲《真情》收視曾高達43點，裡面的角色你認得幾多個呢？
經典處境劇3. 《男親女愛》
由Do姐同子華神合作嘅《男親女愛》，真係一次可一不可再嘅合作，兩人嘅抵死劇情更加係令人抗拒唔到一睇再睇，當中最令人印象深刻一定係Miss毛嘅抵死金句
「你同我off啦！」、「你BT，Bad Taste！我哋係professional架嘛！」、「即刻卸膊，正一三尖八角」等等，呢啲金句到宜家都唔out，呢套劇更創下50點嘅收視紀錄，成為經典！
經典處境劇4. 《皆大歡喜》(古裝版) 及 (時裝版)
《皆大歡喜》嘅主題曲你無理由會唔識唱啦！由家燕姐帶領一眾演員如林文龍、謝天華、趙學而、梅小惠、阮兆祥、廖碧兒等演出嘅《皆大歡喜》，除咗喜劇感超強之外，亦典定咗處境劇總要「食字」先過癮，「池力共鎮」、「洞蜜園」等名稱大家都唔會陌生！
後來更因為古裝版受歡迎所以加開了時裝版，古裝版最後一集更將背景跳躍至現代，增加兩輯的連接性！時裝版亦保留大部份演員同角色名，更加入不同的演員增加新鮮感，如鍾嘉欣、馬浚偉、劉玉翠等等！
經典處境劇5. 《同事三分親》及《畢打自己人》
《同事三分親》及《畢打自己人》呢兩套劇可以話係姐妹劇，前者搵嚟好耐無拍劇嘅關詠荷、金燕玲同埋江欣燕主演，佢嘅集數亦由最初120集增至364集，故事圍繞住廣告公司，而呢套劇亦開始咗情景劇嘅設計，就是每集一個支線故事，追起劇上嚟就非常輕鬆。
至於《畢打自己人》就由毛舜筠同黎耀祥主演，仲搵嚟金燕玲同何守信坐陣，劇集以畢打街為背景，更有「不打自己人」嘅意思，大玩食字！
經典處境劇6. 《愛‧回家》系列
數到近年最受歡迎嘅處境劇，一定係愛‧回家系列，第一輯馬家嘅一舉一動成為大家每日必定留意嘅節目，延續情景劇嘅設計令到觀眾相當受落！馬強(徐榮飾) 、勞麗嫦(林漪娸飾) 、馬壯(黎諾懿飾) 等等嘅重點角色更加係深入民心。
去到第二、三輯，就以全新故事，加入新嘅演員但都唔夠第四輯《愛‧回家之開心速遞》勁，林淑敏憑住「龍力蓮」呢個角色得到「最佳女配角」嘅殊榮，所以處境劇係畀觀眾送飯之餘，亦係畀演員有所發揮嘅黃金時段！
**Follow us on:
- Facebook: CosmoHK
- Instagram: @cosmopolitan_hk
- YouTube: CosmopolitanHK**