講起香港地道街頭小食，除咗燒賣魚蛋之外，又點可以少咗香港人嘅童年回憶「雞蛋仔」呢！由原味雞蛋仔，近年越出越多新口味，真係眼花繚亂啊！不過市面上雞蛋仔店咁多選擇，你哋又知唔知邊間先最好食呢？今次小編為大家搜羅晒全港6大高質雞蛋仔鋪，呢間甚至得到 雞蛋仔關注組 極力推薦！想知道邊間值得一試，又有冇你哋嘅心水？快啲碌落內文睇啦！

圖片來源：SAUCE編輯部、openrice@ALKYY、Konkon22、lo5、hamutarowithyou、arilau907、chachalin、Voracious、Drduck、wtf._.99on、chiying_hana、hokaykay、dinewithyy、美味情緣、Karenkyt、bellywongs、soya1314、urfoodbuddies｜撰文：Sharon

1. 摩芽雞蛋仔

雞蛋仔真係越出越有創意，除咗新口味，連外型都夠晒創新！講緊係位於太子嘅「摩芽雞蛋仔」！招牌星星朱古力雞蛋仔係必食之選，每一粒雞蛋仔都加咗蜜糖星星脆米，朱古力味道特別濃，非常有咬口，層次分明！而且賣相夠精緻，用嚟打卡一流啊！另外，唔鍾意食朱古力嘅朋友都可以一試芝麻同紫薯口味！

【INFO】摩芽雞蛋仔地址：太子汝州街17號地舖營業時間：12:00 - 23:00

2. 利強記北角雞蛋仔

位於北角英皇道嘅「利強記北角雞蛋仔」曾經入圍16同17年米芝蓮街頭小食推介，由1991年開業起到依家已經有好多間分店，遍及港九新界，北角總店門面仲貼滿咗老闆同好多明星嘅合照。想買嚟食嘅朋友要預早啲到，因為每次嚟都長期有人龍，小編都等咗足足20分鐘！雖然等咗咁耐，不過即叫即整嘅雞蛋仔真係好好食，外脆內軟，加上用咗北京雞蛋，蛋香十足！如果鍾意食半邊空心、半邊有餡嘅雞蛋仔就一定唔可以錯過！

【INFO】利強記北角雞蛋仔地址：香港北角英皇道492號營業時間：7:00 - 23:00

3. Ice Puff

嚟到旺角梗係要掃街！位於旺角中心嘅Ice Puff，呢度嘅雞蛋仔係即叫即整，口味選擇繁多，包括伯爵茶味、阿華田脆脆、車打芝士味同黃金咸蛋黃味等等！小編最鍾意就係伯爵茶口味，再另加埋麻薯，口感勁煙韌，食完超有滿足感！行行下街覺得肚仔餓，不妨買一底嚟食啦！另外，呢度仲可以加錢轉杯裝雪糕雞蛋仔，想食好啲更可以轉Gelato意式雪糕，雪糕加雞蛋仔嘅組合超新奇！夏天食就啱晒，消暑一流！

【INFO】Ice Puff地址：旺角彌敦道688號旺角中心一期1樓F51舖營業時間：13:00 - 22:00

4. 媽咪雞蛋仔

講起「媽咪雞蛋仔」相信大家一定唔會陌生，曾榮獲米之蓮推薦，全港分店超過10間，港九新界去到邊總有一間喺你左右！超過20款口味，有原味、抺茶、咖啡朱古力、清香檸檬，仲有鹹味雞蛋仔，包括雙重芝士、芝麻肉鬆同麻辣肉鬆等。當中必食招牌人氣「媽咪朱古力雞蛋仔」，每粒雞蛋仔裏面都有朱古力粒，熱辣辣食仲有流心效果添！

【INFO】媽咪雞蛋仔地址：銅鑼灣希雲街1-5號禮信大廈地下17號舖（港島）尖沙咀東科學館道14號新文華中心地下16號鋪（九龍）荃灣青山道荃灣段289-301號昌華大廈地下16A號舖（新界）營業時間：每間不同

5. 紅磡雞蛋仔

「紅磡雞蛋仔」至今開業超過四十年，依然有一眾街坊同粉絲嘅支持，店內雖小但充滿人情味，每次嚟到都大排長龍！好多人嚟到「紅磡雞蛋仔」都會試最出名嘅芒果班戟，但原來雞蛋仔都絕對唔可以睇少，呢度嘅雞蛋仔一共有9款口味，香脆鬆軟，有超濃厚嘅蛋香味！強烈推薦大家試試朱古力原味抹茶雞蛋仔，一次過試晒三款味道，滿足你嘅需要，而且雞蛋仔會呈現漸變色，外觀吸睛，影相好好睇！

【INFO】紅磡雞蛋仔地址：紅磡大沽街寶利閣2號舖營業時間：12:00 - 20:00（星期四休息）

6. 潮食

雞蛋仔關注組極力推薦「潮食」，只要你係雞蛋仔愛好者，就算未食過都一定會聽過！位於沙田嘅呢間屋邨隱世雞蛋仔店以豬柳蛋雞蛋仔聞名，除咗得到一眾街坊嘅支持，亦成為吸引唔少雞蛋仔雞蛋仔關注組谷友慕名而來～「潮食」嘅雞蛋仔有多達20款，最特別嘅「豬柳蛋雞蛋仔」亦都係全港首創！加入豬柳粒、芝士同雞蛋，每粒雞蛋仔超足料，外脆內煙韌，甚至比平時食開嘅豬柳蛋漢堡更有驚喜！如果鍾意食鹹味雞蛋仔嘅朋友不妨一試！

除咗豬柳蛋雞蛋仔，人氣「蘋果肉桂雞蛋仔」都值得一試！，呢款雞蛋仔超足料，蘋果粒仲有陣陣嘅肉桂香味，內餡多到快要滿瀉，食落又同蘋果批幾似！同朋友Share一齊食就啱啱好啦！

【INFO】潮食地址：沙田乙明邨街9號地下乙明邨街市2-3號舖營業時間：星期一至日 12:00 - 20:00

鍾意食雞蛋仔嘅朋友，你哋心目中最好食嘅雞蛋仔又係邊間呢？