遇上大事件，第一件事搵人祭旗，而唔係正視問題核心。呢種管理方式，香港人應該司空見慣，而遠在倫敦嘅英超球隊熱刺，呢幾年嚟都重覆緊同一個輪迴。
五個失球，喺唔夠半個鐘內發生，熱刺北上作客紐卡素變陣四後衛，大敗1-6，聖占士公園球場風聲鶴唳。「我哋可以見到好多原因，而我本人、董事會、教練團同球員都要一齊承擔責任，尤其是我。」賽後熱刺班主利維直斥表現不能接受，直接解僱臨時領隊史迪連尼（Cristian Stellini）同其他干地帶過嚟嘅教練團成員，由賴恩美臣（Ryan Mason）再次出任臨時領隊。
作為首席助教，史迪連尼呢兩年嚟喺干地手下工作，更藉干地幾次告病假而得到臨陣掛帥嘅機會，以臨時主帥嘅身份帶領球隊贏過曼城、車路士等等勁旅。干地因成績同將帥關係問題被辭退，以史迪連尼今年嘅成績，球隊喺未有進一步嘅長遠規劃之前，暫時頂替球隊主帥一職，利維有佢嘅道理所在。
但而熱刺炒干地嘅時間點，係距離球季結束仲有兩個月之久。喺仲有能夠競爭歐洲賽席位嘅情況下，要帶領一支軍心渙敵嘅「強隊」征戰十幾場賽事，冇時間比佢排新陣，已經強人所難。當然，陰謀論啲講，史迪連尼同其他意籍教練一齊被炒，可視為利維想提早清除干地喺隊內嘅黨羽，比美臣重新嚟過。但事至如今會做得咁肉酸，利維嘅管理責無旁貸。
史迪連尼嘅操練課，比干地更加輕鬆，踢法都比干地更加自由，會比球員喺一套框架之下發揮，而唔係硬性規定每個細節都要保持一致。同時，佢嘅體能要求都冇干地咁「地獄」，減少極難過嘅長跑訓練，對提升球隊士氣有唔少幫助。
熱刺需要嘅係改變，史迪連尼正正係進行緊呢樣嘢。但改變永遠伴隨住痛苦，呢個都係必然嘅事實。一場波嘅失利，就將呢個改變判死刑，做法真係好咩？
「支出總額顯示出我哋投資咗幾多喺隊波度。」今年年初，熱刺發佈上一季嘅財政報告，利維就話，球隊支出咗好多買球員，但計劃唔順利，需要改善。「我哋一直同時保持財政穩定，及保持球隊嘅競爭力，為球隊長遠發展作出最好嘅決定。」
言下之意，利維到底要唔要將轉會決定權放喺下一任教練團身上，仍有商榷之地。但此前嘅投資，令幾任領隊無法從管理層身上得到適切嘅支援，呢點亦眾所週知。剛剛被炒嘅史迪連尼，只係呢個輪迴裏面其中一個受害者，關鍵都係喺返利維身上。