昨晚（6月27日）播出的一集ViuTV節目《戀講嘢》，嘉賓Katrina（陳珮欣）表示曾與國際知名、來自香港韓國出道的歌手拍拖。主持193（郭嘉駿）笑道：「有咩明星我未見過？佢IG幾多人？」Katrina指：「IG followers應該是你5倍，sor，應該是50倍」。193的IG約有60萬位粉絲，50倍即約3000萬。
現年29歲的Katrina提到，與該男星同齡，兩人識於微時，分別就讀不同國際學校，中六時男星表示即將要去韓國做練習生，加上之前提過IG有約3000萬粉絲，不少觀眾和網民都推測是擁有3256萬IG粉絲的王嘉爾。
Katrina與主持分享該男星的照片，193認證對方是知名及國際級的歌手：「佢以前黑頭髮，依家唔係，佢愈紅個樣愈唔同晒。」。Katrina透露，男方在韓國受訓期間，雙方靠web cam聯繫：「佢公司唔畀拍拖，每日受訓10個鐘，佢臨瞓先可以同我傾電話。」Katrina又爆男星指很多練習生都會「容貌升級」，對方曾問他：「我整唔整好？」Katrina勸他不要整，因為外表已經不俗。
男星受訓9個月後返港3天，即約Katrina見面和食牛腩麵，「我覺得自己好大陣牛肉味，跟住食香口膠，佢就錫咗我」。某天約會後二人依依不捨，男方在合照上簽名留念，又以韓文寫了幾句說話：「唔好意思，唔可以成日覆你訊息，我好掛住你，我真係好愛你，真係㗎！」
Katrina透露，男星出道初期曾返香港並相約出來見面，但她認為大家沒有將來，因此沒有應約，其後發現男方unfollow自己，戀情正式劃上句號。
郭奕芯表示：「其實個男仔微時我身邊有朋友認識，佢後來連我朋友都unfollow咗。」193好奇郭奕芯原來認識該名男星，追問之下，郭奕芯爆料指自己17、18歲唱K聚會上見過對方，但當時並不認識他：「我搵咗個女仔陪我一齊去，當晚出現咗呢位男主角。第二日，我朋友message我，同我講原來佢哋做咗啲好親密嘅行為。我冇問返個女仔，後來先知佢係練習生……直頭成晚冇同佢講過嘢，我真係蝕咗，早知同佢傾幾句。」譚凱倫即提出：「咁可能同Katrina時間重叠？」。
