美斯遭香港球迷噓爆變國際新聞　球隊零親善姿態令人更燥

（本文獲原創者授權轉載。文章題目由LINE TODAY編輯所擬。）

美斯去香港「睇波」被香港球迷噓爆呢件事幾個鐘頭後，已經成為咗國際新聞，唔只最初嘅《Daily Mail》報導，還有《BBC》、《The Guardian》、美國嘅《CNN》、澳洲《Abc News》，仲有法國《France 24》，除咗文字相片報導，仲有片段同球迷訪問。

外國嘅報導點都唔會夠香港咁清楚，所以唔洗點解釋，反而想講下個人嘅睇法。老實講，唔好話我呢啲業餘球迷，就算係任何球員球隊嘅資深fans都會明白，球員受傷唔可以落場係無可避免，無人想發生嘅情況，呢啲就算決定性國際大賽都無計。

但係…相信大家燥嘅原因並唔只係梅建國聲稱受傷唔出場咁簡單。

首先由當日公布隊波去香港開始，主辦機構嘅焦點都係放响美斯身上，比幾千甚至幾萬買飛嘅自然會有合理期望係見到美斯落場，呢點唔好話主辦機構或者公關公司，就連單眼佬都知。咁合約到底係點寫？錢係點計？

如果比嘅錢剩係for整隊波（加埋個碧咸）黎香港，然後揮下手，根本無條款要求指定球員一定落場，咁當初就唔應該將宣傳焦點放响美斯身上，咪純粹當佢黎香港揮手宣傳算啦。如果有條款指定要佢落場，即係合約要求嘅重要部份，咁又點解到開場前先知，事後好似同大部份球迷一樣：「我地都同大家一樣好失望呀，哭」咁呢？嚴正聲明譴責告得吧。

其實更令人燥嘅唔只無落場，而係唔只美斯，成隊波黎到香港比人嘅整個觀感，由落機嗰刻無視主持"Please stay us"就頭也不回，到今日忽然受傷唔落場，一點親善嘅姿態都沒有。無錯嘅，國際超級球星球會吖嗎，自我可以大過全世界，比咗錢唔係大晒，但唔好話係交易，去到任何地方基本尊重都要有卦…係佢心情唔好、主辦方得罪佢、還是地方？

睇開波嘅人都會明白，球星無品唔緊要，踢好場波，至少盡返球員責任就無問題，但今次真係乜都無，咁好難唔燥到全場噓爆變成國際新聞。

作者：Goodbye HK, Hello UK
▼Follow Goodbye HK, Hello UK
Facebook: https://www.facebook.com/goodbyehkhellouk

【想在LINE TODAY刊登你的文章或影片，歡迎聯絡我們】