自《阿爺廚房》出街之後，大家都見識到鼎爺（李家鼎）嘅功架，完全冇諗過鼎爺除咗馬術和武術造詣高之外，仲識煮咁多懷舊粵菜，令老一輩可以重溫舊味道之餘，亦教CONY呢啲新一代吃貨大開眼界。深知好多人都想試到這些近乎失傳嘅懷舊菜，鼎爺去年開設了首間菜館「鼎爺私房菜」，講求不時不食，每約兩個星期就會推出一道新菜式。好似近日又推出一系列秋冬菜，CONY當然立即去試，仲見到阿爺真身，同佢合照一幅！
CONY一見到鼎爺就問起佢私房菜一枱難求嘅傳聞，阿爺就笑笑口咁話唔好信晒啲江湖傳聞，想食懷舊菜就book枱啦，最少湊夠4個人就得啦，有心想試或者encore嘅，預早一個星期打個電話就有辦法咁話。今次試菜跟足慣例，每道菜式都會好似西餐fine dining咁有即場解說，讓饗客們可以了解到菜式的食法和巧手之處。阿爺指餐廳唔係主打矜貴食材如鮑參翅肚，而係手工。好多道菜式都以古法烹調，由準備食材開始都要花上不少工夫，吃的是傳統智慧、心機和時間。
好似鮑魚和柚皮等至少要5日前煨定，又如今次嚐到的「順德煎釀鲮魚」，要先將四條魚起骨打膠，再重新釀入兩條魚內，然而上菜時驟眼會以為兩條魚都係完好無缺，可見師傅工架十足！另外，「古法鹽焗雞」亦要先將新鮮的嘉美雞以米紙包好，再將炒熱的粗鹽放在砂鍋中包裹著整隻雞再焗。原來以鹽包雞焗煮的時間好難拿捏，先要將鹽炒得夠熱，焗雞的時間才會準確。
踏入秋天，第一樣必食的當造食材當然係蟹。阿爺選用約一斤重的花蟹，簡單以大量鮮茄調味，製作清新開胃的「鮮茄花蟹粉絲煲」。表面睇菜式簡單，但食落就睇到箇中心思，蟹肉全部被起，混入粉絲之中，而蟹鉗亦已預先開殼，食客可以不費吹灰之力就食到啖啖蟹肉。
一到冬天，又點少得暖笠笠嘅臘味煲仔飯？鼎爺選用本地生曬臘腸、潤腸和臘肉，再自家風乾處理，而米會先浸泡30至45分鐘，再用砂煲同明火慢煮，臘味的油香完全滲入飯粒，並且粒粒分明。最後甜品有「蒟蒻红棗糕」，質感與坊間的红棗糕完全不同，阿爺以鮮淮山磨蓉再加入红棗蓉，口感有點似大菜糕般爽口，但充滿红棗味，食完清爽唔會滯，作為一餐的總結剛剛好。
坦白講，鼎爺私房菜的價錢唔便宜，最平菜單$888一位。好多人都問點解要用咁多錢食粵菜？負責人就反問，咁點解你又肯畀相同價錢食一餐法國菜或者廚師發辦（ Omakase）又唔會覺得肉赤？其實好嘅菜式唔單止要視乎「國籍」，仲要睇用料、手工、心機、創意，到底值定唔值，試咗先至下定論都未遲。
鼎爺私房菜
地址：銅鑼灣登龍街18號V-Point 21樓全層
電話：2387 6969
