如果去旅行嘅時候，鍾意睇景嘅大家，一定要試下小編今次推介嘅另類旅遊！參加呢個另類旅遊有一個好重要嘅條件，就係唔可以畏高！
鍾意日本嘅大家，唔知有冇聽過靜岡縣呢？
呢個地方出名在成日都睇到富士山，而且仲好多靚景！
最特別嘅係，呢度有好多吊橋，有成19條咁多，其中一條仲入選「死前必過一次嘅吊橋」頭 10名添！
吊橋打卡雖然唔罕見，但為左吊橋獨有嘅靚景，就要練出強心臟喇！
好似呢條《塩郷の吊橋》，又叫「恋金橋」，係大井川最長嘅吊橋～
全長約 220米，高約 11米，可以行嘅通道就只係約闊 40厘米嘅木板，真係少啲心血都腳軟～
除左因為佢嘅長度，呢度嘅景色都係必去遊覽嘅原因！
呢條橋嘅下面，係民居同大海，最特別嘅係會有火車喺橋底穿過，好彩嘅話仲會遇到蒸氣火車添～
一開始行，下面有民居，所以感覺好踏實；再行出少少見到火車軌，當有火車經過嘅時候，雖然會令人內心興奮，但係吊橋開始搖晃，會有少少腳軟；行到中間，就算行得幾平穩，吊橋都會左右搖擺得好勁，但回望過去，獨特景觀盡收眼底，一望無際嘅大海，配埋隆隆經過嘅火車，好值得一睇！
另外一條吊橋大有來頭，因為佢入選左網上旅遊平台TripAdvisor嘅「死前必需要過一次的吊橋」全球排行榜，仲擠身頭 10名添，可見佢嘅風景幾引人入勝！
呢條咁夢幻嘅吊橋叫做《夢の吊橋》，建喺山峽之間，要行一段山路先到，少啲腳骨力都路唔得！
但行得辛苦係值得嘅，因為呢度嘅靚景真係好迷人！
木橋唔太高，只有水面 8米，亦唔太長，約 90米左右，但可以通過嘅空間有限，每次只可以過 10個人嫁咋！
呢度最吸引人嘅原因就係一年四季都有美景打卡！
秋天係旺季，滿山紅紅黃黃嘅楓葉，襯埋Tiffany blue嘅湖水，靚到令人唔捨得眨眼！
果然係一生必睇嘅靚景，自問強心臟嘅你，一定唔好錯過呀！
《塩郷の吊橋》
地址：静岡県榛原郡川根本町下泉
《夢の吊橋》
地址：靜岡縣榛原郡川根本町Sumatakyo 428-0411
Text: Holiday Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）