以前每逢書展，總會有大批女星推出寫真集湊熱鬧，尤其早年潮流興𡃁模，唔少更一窩蜂湧去拍寫真，周秀娜、陳靜、李蘊等亦因此而成功彈起，俘虜唔少宅男嘅心，成為一代女神，之後更成功轉型，唔使賣肉博收視，宣布收山……唔係，係封胸至啱！
撰文、圖片：東方新地
35歲周秀娜成功轉型封胸
憑出眾身材進軍娛樂圈，2009年處女寫真集 《Kissy Chrissie Saipan》 喺書展期間銷量近三萬 本。人氣急升下，周小姐逐步轉型，現已惜 「肉」如金，2014年以素顏拍攝愛情小品 《分手100 次》 ，演技備受關注，2018年憑電影 《29+1》 提名 《香港電影金像獎》 「最佳女主角」 ，成功將大家 嘅視線從佢嘅body轉移至演技上。
38歲孫慧雪最索靚媽
曾經喺第一輯《美女廚房》當中做過女助手「粥粉麵飯」嘅「飯」，打扮酷似日本漫畫中嘅女僕，孫慧雪形象討人喜愛。惟入行多年，事業未有重大突破，直到16年喺劇集《純熟意外》擔任重要角色，獲吳啟華公開稱讚，同年又喺《三個女人一個「因」》中首次擔任「女二」，近年更加係 TVB監製陳耀全嘅常用演員。為紀念入行十周年，決定喺16年發行寫真集《 Once》，雖然17年生咗囝囝Riley，但身材仍然keep到，19年再推出寫真散文集《那個願沒有圓》，分享童年往事、演藝經歷，抒發生活感受，同時發售相集《私圖》。
29歲李蘊 14歲初熟照片成話題
曾經係幼齒組合Cream嘅主音、舞蹈組合Loving Girls嘅隊長以及Ice Band嘅鼓手，十四歲時李蘊為雜誌拍下一輯初熟照片，引來軒然大波。至2010年真正大個女，第一本寫真集《李蘊Renee》喺書展銷量逾一萬四千本，及後加推《李蘊Changed》、《寵愛李蘊》，體態更加撩人。2015年收山結婚，現育有一女一子，依家個body只有老公可以欣賞。
31歲陳靜 成功殺入電影界
2008年，陳靜(DaDa)孖陳柏宇拍攝飲品廣告而獲封「 E神」，乘勢同師妹王梓如、李莉琳推出寫真集《 First Impression》，試吓水溫。之後再單飛出版寫真集《 DaDa Chan Motion Shanghai 2011》，內有華麗內衣、高貴晚禮服，床上動作誘惑又曖昧。2012年，Dada同杜汶澤、鄭中基演出電影《低俗喜劇》，飾演爆炸糖一角成為一時佳話，獲提名台灣《金馬獎》「最佳女配角」並奪得《香港電影金像獎》「最佳女配角」，一舉成名，成功殺入電影界，由2008年至今拍咗二十多部電影。
41歲楊思琦曾獲《香港小姐》六大獎項
時光飛逝，當年嘅思琦妹已經蛻變成思琦媽媽了，升呢為一女一子之母。仲記得19年前，思琦參加《香港小姐競選》獲得冠軍，同時奪得「最上鏡小姐」、「網上最奪目小姐」等六個獎項，認真巴閉！2018年，即將踏入四十歲嘅思琦，決定推出個人寫真集《 Miss Szeki》，絲毫不減當年勇態，童顏笑臉依然殺死人！
34歲樂瞳轉搞洋酒生意
同孫慧雪一樣，樂瞳為紀念入行十周年，選擇影本寫真送畀自己，呢本於2017年推出嘅作品，賣點係三點式泳裝。入讀 TVB藝員訓練班入行嘅樂瞳，身高158cm，嬌小玲瓏，多演任性或精靈可愛嘅角色，曾三度入圍競逐「飛躍進步女藝員」，更憑《陪著你走》「何娜」一角入圍《萬千星輝頒獎典禮2015》角逐「最佳女配角」獎㖭！近年仲踩過界從商，最近大搞洋酒生意做老闆。
31歲劉欣宜封胸退隱江湖
唔知係邊個劉欣宜？Miyoko又唔識？咁E cup baby你一定有印象！劉欣宜參加過2006年、2007年和2008年嘅遊戲展、動漫節，由於身材豐滿扮演性感電玩遊戲女郎，吸納無數宅男粉絲。2009年出版《夏之盛放》寫真集後，同李蘊合唱韓國改編歌曲〈 Mister〉、〈我不是你要的女生》，均遭到網民強烈批評。E cup baby早年退出娛樂圈，2016年下嫁音樂人陳子敏，正式封胸退隱江湖。