張頴康入行逾20年有所啟發：成為「綠葉王」也滿足

入行逾20年的張頴康由初入影圈到由無綫訓練班起步拍劇，一直默默耕耘，由《回到三國》的范根，到近期《痞子殿下》的范壯龍、《法言人》的戇直大狀，皆令觀眾留下印象。成為劇集中流砥柱的他曾有閃過重投電影圈給自己挑戰的念頭，同時也樂於在無綫演到甘草演員，他說：「有時都會諗，喺呢度係咪做到甘草呢，我又冇問題，因為我鍾意返工，但係有時都會諗，係咪應該返返出去見識吓。」

張頴康坦言當然希望做主角，但熱愛演戲的他近期想通了，覺得能成為一位「綠葉王」帶歡樂給觀眾也滿足：「最近突然間諗起，有啲好戲嘅前輩好似廖啟智、吳孟達離開咗，自己如果做唔到主角，點解唔可以向住佢哋呢個方向去行呢，都可以畀到觀眾歡樂，呢個係做一個演員嘅使命感。」入行愈久，他慢慢發覺自己追求的並不是名利，而因為喜歡演戲而入行，只是追求一個角色，不斷突破自己，用心去演戲。

東網網站 : https://on.cc/東網Facebook專頁 : https://www.facebook.com/onccnews/