2022年底，美斯終於喺世界盃封王，成就夢寐一生嘅霸業。當然阿根廷嘅成功，唔係單單美斯一人嘅功勞，教練團喺中場改動上面嘅決定，令阿根廷一路殺上決賽，先有最後美斯黑袍加身，高捧金盃嘅經典畫面。
相比舊年同樣奪標嘅美洲盃，球隊喺今屆世界盃失卻尼高干沙利斯同盧斯素，令領隊史卡朗尼要臨時變陣。小組賽第一場排出帕利迪斯、迪保羅為雙防中嘅4-4-2，對沙特阿拉伯食咗個終極大冷門，到對墨西哥都未真正解缺問題。
而到咗第三場對波蘭，史卡朗尼終於搵到球隊對fit嘅中場組合，一路打上決賽攞冠軍。呢邊講嘅，係以下三名球員組成嘅新中場三角：
麥亞里士打 - 組織核心，連結各路隊友
迪保羅 - 中場工兵，美斯嘅貼身保鑣
安素費南迪斯 - 以防守中場為名，行全能中場之實
當中麥亞里士打同安素費南迪斯，更加係今年先至得到阿根廷足協征召。效力賓菲加嘅費南迪斯專心做deep-lying playmaker，大部份傳球都喺係己方半場完成。史卡朗尼之所以對佢委以重任，因為睇中佢用球嘅冷靜同清脆，唔會做多餘嘅冒險動作。敵後現位攞波嘅任務，交比麥亞里士打、迪保羅呢對一柔一剛嘅正中場，一左一右支援前場。
而之所以話迪保羅係一個比較剛性嘅角色，唔單止因為佢比較硬淨，而係因為佢比較冒險。喺決賽之前嘅6場比賽，比起其化中場球員，迪保羅傳球次數比較多，但成功率比較低。喺球場右邊half-space位接球嘅佢，會比較勇於向前推入對手中、後兩線之間，令負責夾擊嘅對手要喺美斯同迪保羅之間決擇，從而為美斯、麥亞里士打等球員拉開更多空間。
縱然費南迪斯係阿根廷國家隊中場最後一線，但喺迪保羅的保駕護航之下，費南迪斯不致於被強壓突破。因應對手，史卡朗尼有時候會比迪保羅再踢後半格，同費南迪斯形成中場嘅double-pivot，比麥亞里士打同美斯、艾華利斯形成前插嘅三叉戟。甚至進攻型嘅閘位有時會參與其中，拉闊對方防守陣式，以曝露更多空位。
類似嘅招式，喺對沙特阿拉伯嗰場敗仗成日出現，但可惜輸喺對手精心設計嘅越位陷阱之上。但加入咗麥亞里士打，反而令阿根廷呢一招更加有層次。
麥亞里士打需要更多配合，先可以發揮1+1>2嘅組織威力。而球隊配置上，阿古拿負責左翼插上、迪保羅負責支援、費南迪斯負責逗底，艾華利斯負責直衝禁區，佢身邊包圍嘅阿根廷球員各司其司，麥亞里士打專心成為美斯之後，排第二嘅playmaker角色。
七場世界盃，球隊以美斯為核心嘅雙箭頭配置一直冇變，但小組賽後段喺中場嘅大執，令球隊運行得更加順暢，以史卡朗尼為首嘅教練團，實在應記一功。