週中英冠大戰+前英超對碰，李斯特城主場對修咸頓，賽前兩支隊伍正有機會爭取直接升班機會，因此兩隊今場本來應該戰意十足。主隊李城方面排出4-3-3陣式，前線三叉戟繼續由華迪拍住左右兩翼嘅馬維迪迪(Stephy Mavididi)同法迪胡(Abdul Issahaku Fatawu)，後場兩閘則用返列古度彭利拿(Ricardo Pereira)同側士田(James Justin)。另一邊嘅修咸頓同樣4-3-3陣式，但由於傷兵問題需要由獲加比特斯(Kyle Walker-Peters)代踢左閘，中場兩位較為常規正選嘅史超活岩士唐(Stuart Armstrong)同唐斯(Flynn Downes)因傷缺陣，結果中場用上20歲嘅查理士(Shea Charles)同般尼茅夫借將路夫維(Joe Rothwell)。
上半場李斯特城主要控制節奏，並且有較多射門起腳嘅機會，25分鐘李斯特城中前場反擊，右翼法迪胡係獲加比特斯身後起動，利用對方缺乏shoulder check之時接應賀爾(Kiernan Dewsbury-Hall)嘅斜線，食住身位起腳入網領先一比零。
呢一個入球都可以反映到全場比賽嘅走勢，對於李斯特城而言，進攻組織時右閘列卡度彭利拿會內切中路，形成3-2-4-1陣式，希望Overload對方中路。至於防守時右翼嘅法迪胡亦不時回後到後防線填補人數，不過更多時間李斯特城集中喺Mid-block防守，係自家半場搶截再打反擊，因此可以見到修咸頓喺上半場有64%控球率，但只有兩次起腳，兩次起腳更加係被球員擋出。
下半場有一球在手嘅李斯特城更加安心打反擊，62分鐘馬維迪迪左路禁區內傳中，尼迪迪(Wilfred Ndidi)衝入禁區撞入成2比0，及後75分鐘法迪胡係右翼沿禁區頂推橫射遠柱入網形成3比0。呢個時間修咸頓已經士氣同心態崩潰，79分鐘華迪伏兵禁區一射入網，以37歲之齡攻入英冠聯賽第16球。最後79分鐘李城快速反擊，華迪禁區橫傳比法迪胡入網，個人上演帽子戲法並且協助球隊大勝五比零全取 3分，以44戰94分繼續排喺第一位。
能夠喺季尾大勝一場嘅李斯特城，除咗係舒一口氣外，更加係吐氣揚眉，譬如見到領隊有刻意作出輪換，令到今場可以派出最佳陣容，法迪胡唔再係好似季初只有扭波同速度，而家仲有End product。呢場大勝為球隊升班帶來重大意義，因為李斯特城早幾場嘅連敗，確實令人感到悲觀，而如今仲有兩場賽事分別對中游嘅普雷斯頓同要護級嘅布力般流浪，升班形勢大好，並且希望能夠順順利利。
至於大敗嘅修咸頓今場有一半原因可以講係傷病困擾，譬如門將用緊2號門將號麥卡菲，中場用20歲嘅查理士感覺有啲怯場，左中場嘅艾利保(Joe Aribo)帶波更多嘅時間想自己嚟，替工左閘嘅獲加比特斯對住法迪胡搞唔掂，失位頻頻。因傷病問題用上後備球員，令到今場失準係其中一個原因，而另外一半原因係球隊嘅決心，最簡單協防、單防所給予嘅壓力都唔足夠，攞第二球嚟做例子，李斯特城傳中一刻尼迪迪「飛將軍」咁衝入禁區飛頂，而呢一個應該要有中場球員跟防，而非後防球場突然見到佢再要對頂。另外，就算要堅持後場搓傳，都應該要有相應嘅搓波能力先好執行，今場真係非常多李城係中場搶到再打突擊或轉守為攻嘅場面，所以今場大敗另一個原因相信就係決心不足。
最後目前英冠升班形勢
第1位 李斯特城44戰94分
第2位 列斯聯44戰90分
第3位 葉士域治 43戰89分
第4位 修咸頓 44戰84分
修咸頓目前直接升班只有數字上嘅可能，榜首嘅李斯特城大勝過後士氣、狀態、陣容人員更佳，升班只差兩步相當接近，因此餘下一席應該係列斯聯同葉士域治之爭，前者剛剛係最後關頭反勝米杜士堡4比3，勢頭正好，餘下兩場對手分別係昆士柏流浪同修咸頓。至於葉士域治要到下週六先再有比賽，雖然有更多時間休息叉足電，但係近三仗連續不勝，未來三場對手分別係侯城、同曼聯踢成3比3嘅高雲地利同埋護級水深火熱嘅哈特斯菲爾德，其中至少兩場係硬仗，所以列斯聯同葉士域治之間，列斯聯嘅機會看似更大。
▼Follow 足球港場
Instagram: https://www.instagram.com/footballarena_hk/