香港人愛飲珍珠奶茶，如果珍奶味嘅pizza呢，你又夠唔夠膽試？香港Pizza餐廳「薄餅博士PHD」近日推出新產品「黑糖珍珠奶茶薄餅」，震驚唔少網民，有少部分珍奶愛好者隨即表示想試一試，但亦有食客指其「 獨特外型 」 令佢「諗起明將」、「唔好玩食物」~
其實珍珠奶茶大熱所掀起嘅「珍奶」美食風暴後，唔少食品如拉麵、芝士撻、乳酪、軟糖亦打住「珍奶」名堂嚟搶市場，其實珍珠奶茶pizza並唔係新鮮事，台灣嘅 Dominos之前已經推出過黑糖珍珠Pizza！其餡料主角除咗彈牙嘅黑糖珍珠之外，仲有白色麻糬粒，做成黑白配，最後更喺面層淋上蜂蜜。
而最近PHD喺Facebook專頁出帖， 「任何嘢結合咗黑糖珍珠奶茶就會更加美好，點解冇 Crossover 人見人愛嘅 Pizza？」 並推出黑糖珍珠奶茶薄餅，「以大大粒Q彈珍珠，配上濃厚香甜黑糖醬，仲有邪惡拉絲芝士，齊齊刺激你味蕾！」餐廳稱，款式數量有限，售完即止，更加上hashtag「#手快有手慢冇」。
傳統嘅鬆軟Pizza餅底上鋪滿大大粒煙靭有嚼口嘅珍珠，然後再淋上濃厚香甜黑糖醬，當然唔少得Pizza必備嘅邪惡拉絲芝士，幾種食物味道互相融合，齊齊刺激你味蕾！呢個新潮前衛嘅Pizza現已有售，如果想同朋友一齊分甘同味，可以叫一個普通批（$68），如果想獨自試，就可以叫自私獨食一人餐（$40）。
雖然黑糖珍奶薄餅夠晒創新，不過網民意見都幾兩極，據網上食客分享，味道其實冇想像中咁奇怪， 有啲似吉士麵包，似甜品多過pizza！但亦有人留言稱以為PHD提早發出4月1日愚人節貼文，「啱啱見到人Post以為惡搞，原來係真」、「我反咗你地白眼」、「意大利人見到呢啲嘢應該會爆血管」、「密集恐懼症發作」。
想知道真正味道如何都係要靠自己去嘗試，黑糖珍珠奶茶Pizza數量有限，錯過咗就冇啦！另外要留意東涌區域不設供應。