高海寧早前憑內地劇《三十而已》人氣急升，演技備受注視及欣賞。日前高Ling獲《三十而已》製作人賞識，邀請在內地網絡電影擔正女主角，同台灣型男張書豪飾演情侶。現身處北京的她已完成隔離正式投入拍攝工作，不過在一場攀石戲份中，畏高的高Ling堅持親身上陣，搞到雙腳滿佈瘀痕，十分可憐，看來人仔都唔易賺！
文：東方新地 ｜ 圖：高海寧IG、高海寧微博、張書豪IG、新傳媒圖庫
拍到雙腿瘀晒
高海寧在無綫拼搏十二年，終於爬上女一之位，今年更是她的收成期。在港發圍的同時，高Ling挾著內地劇 《三十而已》在內地同樣人氣急升。現身處北京的她，原來被《三十而已》的製作人睇中，為她度身訂造角色，在網絡電影《Tan Tan害我分了手》擔正女主角，同台灣型男張書豪飾演一對。高Ling見事業有新發展自然會份外投入，早前向來有豆腐Ling之稱的她，為拍攝一場攀石戲，明知自己有畏高都堅持親身上陣，最後搞到雙腿滿佈瘀痕，相當可憐，睇嚟人仔都唔係咁易賺！
內地爆紅笑住去執金
其實咁多年都靠自己的高Ling為了供兩層樓養全家，賺少啲都唔掂，眼見國內遍地黃金，當然笑住去執金。08年參加港姐入行的高 Ling，由最初以34D身材為焦點，到近年專注拍劇磨練演技，終獲無綫力捧脫離「花瓶」之列，今年密集式劇接劇，由六月起先後播出的 《殺手》 、 《迷網》 、 《反黑路人甲》 及 《 C9特工》 ，觀眾幾乎發夢都見到高Ling。
甩拖後醒覺 獨力孭樓養家
全球疫情雖然仍未受到控制，不過高 Ling成功打入內地市場，不想錯過任何一個良機，毅然冒疫北上，知情人士透露：「高 Ling咁多年都專注拍劇，終於有機會返內地，佢對眼發晒光，同鄧智偉分手後，高 Ling覺得自己浪費咗好多時間，所以佢今年加緊搏命，開完 turbo拍晒香港嘅劇，難得無綫肯放佢返大陸三個月拍劇，唔止會拍劇，仲會有好多商演同綜藝節目，食到呢條水高 Ling有排做，就算去同返都要隔離，佢都覺得值得。」
高 Ling愈戰愈勇，北上發展潛力無限，近月她先後開通了多個國內社交網，頻頻上載視頻與網民互動，倒奶教做運動又跳蛇舞，全力吸粉。知情者說：「高 Ling係孝順女，屋企以前環境麻麻，所以佢好早就出嚟做嘢孭起頭家，除咗要養父母同內地嘅婆婆，兩個讀緊書嘅細佬都要供書教學，聽講佢除咗五年前上車做業主買咗油塘層樓，早前佢仲買多間樓畀父母揸手，一個人獨力供樓養咁多人，唔怪得佢搏晒命搵錢。」與鄧智偉拍拖多年從來冇嘢過手，高 Ling賺的錢全部有血有汗，值得欣賞！