區議員服務地區，好多時都會影低地區情況，以便要求政府跟進並向市民匯報。過往區議員影相時不時都用手指向有問題嘅地方，搞到畀街坊笑老土，而灣仔區議員楊雪盈（Clarisse）近日都有上載落區相，同樣都被網民揶揄，有網民仲留言問佢做乜扮大媽。明明係政壇小花，但就被指係大媽，真係慘囉。
話說Clarisse近日喺社交網站上載咗一張落區照片，照片中嘅佢舉起左手，好似跳舞咁，連佢自己都形容張相古古怪怪。有網民都話睇唔明，仲反問佢係咪跳緊舞，亦有人留言話︰「大媽不易做，不是靠樣子」。
廣告（請繼續閱讀本文）
雖然有人指佢扮大媽，但都有網民支持佢，有人就留言讚佢夠仙氣，亦都有人話佢個姿勢好正。雖然今次佢張相係古怪，但都有網民認得出喺邊度拍攝，仲有人笑佢踩爆路面，似乎大家都估到佢想帶出有乜嘢地區問題。張相雖然古怪，但都算成功引起大家對佢同社區問題嘅關注，真係一舉兩得。而佢回覆時解釋，因該處路面有裂痕，所以要影相畀有關部門，希望佢哋着緊啲跟進喎。
東網網站 : https://on.cc/
東網Facebook專頁 : https://www.facebook.com/onccnews/
廣告（請繼續閱讀本文）