上年娛圈喜事重重，結婚生仔陸續嚟，豬年似乎繼續當旺，37歲袁偉豪早前就公開預告，有意向細十年女友張寶兒求婚！有消息指袁偉豪正密謀效法好友黃翠如蕭正楠，秘密到外地註冊，隨時低調閃婚!
撰文：東方新地｜圖片：東方新地、Instagram
袁偉豪密謀外地註冊秘娶女友
袁偉豪、張寶兒於17年拍《打工捱世界2》撻著，拍拖一年多以來，張寶兒樂做跟得女友，除咗投男友所好事事照顧周到，去年袁父患癌離世，張寶兒更形影不離陪伴支持男友度過低潮，令袁偉豪非常感動，加上獲雙方家人開綠燈！
對男友千衣百順
二人拍拖以來不時放閃，袁偉豪亦由昔日花弗男變暖男，對女友呵護備至，難得父親經營成衣生意一家住禮頓山出身富裕的張寶兒，亦對男友千依百順愛得投入，不時公開大讚男友，更一早融入袁家。據知情者透露:「Bowie(張寶兒)性格好單純，咩都就晒男友，阿Ben做乜佢都咁支持，好似阿 Ben 鍾意玩小型賽車，又鍾意揸電單車，佢都會跟埋去玩，有時阿Ben拍劇太忙，佢仲會幫男友執屋，女友咁體貼又錫自己，阿Ben點會唔冧?」
上年5月父親患癌離世，正在趕拍劇集《鐵探》的袁偉豪情緒大受打擊，張寶兒一直在身邊細心照顧，默默支持男友度過低潮。據知情者透露:「Bowie雖然年紀輕咋，但好識人情世故，又識得照顧老人家，阿Ben爸 爸患病嗰段時間，佢成日會陪喺阿Ben身邊，一齊照顧袁父，所以袁媽媽都 好錫佢，覺得呢個女仔性格純品好難得，都叫阿Ben千祈唔好辜負女友!」
深得準奶奶歡心，早前張寶兒就黐實男友陪袁母去九龍城吃下午茶，準婆媳孖住坐好好傾，感情看來相當好，之後三人更一齊去揀紅酒，似乎真係 有喜慶事要慶祝!
當正半邊仔
蜜運甜到漏，袁偉豪直認今個農曆年雙方家人不停催婚，就連打開全盒，都會叫他們吃糖蓮子，似乎好想阿Ben快些成家兼生仔。據知情者透露:「 其實拍拖冇耐，Bowie已經帶阿Ben返屋企見父母，等佢同屋企人打成 一片，之前Bowie禮頓山屋企裝修，張爸爸都有問阿 Ben 意見，已經當正佢係半邊仔。」
袁偉豪同媽咪黐住揀紅酒，張寶兒就乖巧企喺身邊未有插嘴。
睇咗二十分鐘都揀唔啱， 離開舖頭時袁偉豪就細心 推門讓媽媽和女友行先。
「其實阿 Ben 已經有晒結婚計劃，拜年被催婚，佢都借啲意問女友 點? Bowie仲答話『我跟你!』，阿Ben就當正求婚成功咁，不知幾開心，佢好想學翠如同蕭正楠咁，喺外地秘密註冊完先公布，佢仲同翠如打聽，邊啲 外國地方註冊好，睇嚟佢隨時會有行動!」，既然女友張寶兒都講明跟硬佢，袁偉豪做張家億萬女婿睇怕指日可待!
即時回顧：
袁偉豪為護女友嬲爆甫車牌
話說，日前袁偉豪喺facebook出post發文公開一個車牌，並寫住：「黑色旅行版 Legacy B4，你駕駛態度非常惡劣，你超速，推人，豎起中指，四眼哥哥，我俾返個like你」，隔住個mom都感覺到Ben不滿同有幾嬲嬲豬呀！
其後，Ben先留言指：「我女朋友開車！女友比人推呀，觀塘繞道行80，我們已經行85快線，不停喺我哋後邊眨高燈又推完一輪，中線爬我哋頭，然後我按下車窗，指住佢問佢想點？四眼哥哥之後快放，快放一會，入將軍澳隧道之前，佢入秀茂坪就豎起中指，我覺得佢真係好討厭！」，原來咁勞氣係因為Bowie畀人蝦！
之前，TVB藝人余德丞(Dickson)踢波期間暈倒，更一度送至深切治療部留醫。當時，Bowie卻不慎上載一張余德丞與同劇演員食飯的黑白照，雖然Bowie急剷相片換上彩色照，但已經被大批網民鬧爆，身為男友的袁偉豪兩度留言解圍！
張寶兒，在ig貼一張新劇《鐵探》合照，並寫道：「鐵探精神。#鐵探#一個都不能少#細超#心不放棄身體就會跟隨#一定要快點康復#還有阿招#祝福#打氣#pleasegetwellsoon#nevergiveup」相中還有謝東閔、梁烈唯、余德丞、袁偉豪，張寶兒，和未有出鏡的蔡思貝。本來加油、集氣係出於好意，但張寶兒卻將相片轉為黑白照………
重新Po彩色照
未幾，張寶兒立即將黑白照「下架」，再重新上載一張一模一樣、但變彩色相。
網民鬧爆
有網民見到黑白相當堂嚇一跳，而張寶兒急急回應網民解釋：「我見到都嚇一嚇！一個月前我係draft設定咗圖片filter，今日鋪前改了顏色，但鋪後卻發現佢仲儲存咗一部分之前設定。所以唯有九秒九下架重新設定。希望大家不要有誤會！」不過網民話既然本身係彩色照，點解要多此一舉轉黑白照，插佢狡辯，有網友更舊事重提，話早前袁偉豪爸爸過身，張寶兒又疑似趁機賣郵輪廣告！
寶兒向大家講對不起之外，再作解釋，指設定有問題Po了3次，等到第4次才成功！
袁偉豪護花
網民鬧到張寶兒狗血淋頭，男友袁偉豪21分鐘後留言護花，留言叫大家一齊支持余德丞，遠離負能量……
可惜網民群情洶湧，不斷數落女友，袁偉豪今早再度留言，希望為女友解圍，但似乎無助平息事件，有網友連袁偉豪都鬧埋！
張寶兒就回應男友：「謝謝你。不過不用為我擋。我要解釋的已經解釋過，各人喜歡如何理解可能關乎各人的價值觀。如果是心水清的，或者願意認識我的，就會願意知道我是什麼人——可能還是有點大意（對不起，我也在一天天學習成長），但絕對對自己的心性和思考有要求。我相信愛是最大的力量，所以會盡我的努力愛身邊所有人。對不起，在你專注開工的時候為你帶來麻煩。請不用把精力放在這裡，我們好好祝福德丞要平安，繼續為他凝聚正能量就好了。」
屢次出事
張寶兒唔係第一次玩ig「出事」被網民喪插，對上一次係今年5月底，當時袁偉豪的爸爸不幸離世，傷心欲絕的袁偉豪在社交網寫下沉痛感言，「樹欲靜而風不止 子欲養而親不在 爸爸永遠懷念您」袁偉豪的爸爸與癌病搏鬥多年，早前不幸離世，傷心欲絕的袁偉豪在社交網站公布父親離世的消息，寫下感言及上載多張與父親的合照、以及父親年輕時的照片。袁偉豪又叫爸爸好好休息：「放心，媽媽交給我吧。」
袁偉豪：你是我心目中最堅強的爸爸
人稱泰哥的袁偉豪爸爸，從前是一名警察，從袁偉豪上載的照片可見袁爸爸年輕時一臉英氣，當中有其穿上警察制服的舊照，亦有一家人的家庭照。袁偉豪稱爸爸是一位為市民服務的好警察，又寫道：「你是我心目中最堅強的爸爸，辛苦你了。不再痛苦，好好休息。」
張寶兒稱袁父「爸爸」
至於袁偉豪女朋友張寶兒，早前拍攝新一季《學事學非》時雖然保持歡笑，但當接受訪問時提到袁爸爸去世，亦不禁傷心落淚。張寶兒受訪期間亦以「爸爸」稱呼去世的uncle，可見佢同男朋友家人感情相當要好。所以袁偉豪女友張寶兒亦有感而發，早前喺社交網站寫下大段感言，但就被網民指佢其實係乘機賣廣告！
張寶兒有感而發
向來給人感覺係個開心果的張寶兒，人前經常嘻哈大笑，在網上亦不時發放正能量，早前佢上載一張自己喺遊輪上的照片，寫下大段感言，類似係自己對「生命」的一番感受，似乎都係因袁偉豪爸爸離世所以有感而發，亦希望安慰男友。
被質疑賣廣告？
不過有眼利網民發現，在文字下的一大hashtag中，出現了「#世界夢號」、 「#dreamcruise」及「#海洋的氣息」等字眼，似乎就係講緊Bowie身處的星夢郵輪「世界夢號」，難免有人覺得佢係賣緊廣告…
張寶兒：下次會小心啲…
張寶兒之後出席無綫節目《海上夏日郵樂園》活動，提到被質疑借男友父親離世賣廣告，寶兒就話該文章係男友爸爸離世前後幾日寫，純粹因為嗰幾日發生的事有感而發。又表示作為藝人，講任何嘢都可能令人覺得係賣廣告，下次會小心啲。
袁偉豪Man爆護花
對此袁偉豪在IG上載一張張寶兒笑得非常燦爛、以摩天輪作背景的照片，並留言為女友護航：「不用上心，懂你的人便會懂」下面仲有「遠離負能量吧」、「好好建立自己的生活」等hastag，網民見到都大讚袁偉豪護花man爆，果然係暖男！
