文青女神北上拍劇　袁澧林搶晒女一峰頭

內地古裝劇《聽雪樓》最近熱播，當中香港藝人「文青女神」袁澧林、宣萱都有份演出。袁澧林北上發展拍劇，一做就做第二女主角，條路都幾順。最緊要內地網友，鍾意佢多過鍾意女一袁冰妍，袁澧林成功搶晒焦點！

網友對袁冰妍演出唔多Buy，話佢唔夠氣質，演唔出角色嘅精髓，彈多過讚，真係慘！相反地，網友就勁鍾意袁澧林，劇中佢飾演宣萱個女，佢為咗愛情同阿母反面，之後會慢慢黑化，正因為角色有好多發揮空間，網友都讚佢演技出色，仲讚佢有氣質同埋靚女添！

而宣萱喺劇中就做大奸角，宣萱一直以嚟都係做正面啲角色，今次畫風一轉做奸角，大家都覺得新鮮，話佢呢個奸角夠晒霸氣呀！

東網網站 : https://on.cc/

東網Facebook專頁 : https://www.facebook.com/onccnews/