【搵食CONY】直撃！過江龍梳乎厘班戟店gram今日開幕啦！

唔係講笑，日本梳乎厘班戟店gram一有消息話即將會喺香港開店已經有鋪天蓋地嘅報道，冇計啦，呢間係日本超人氣嘅班戟店首次打入海外市場，而第一家海外分店嘅選址就係香港，大家簡直覺得自己係「被選中嘅細路」，難怪又會咁興奮，咁期待嘅。

相信大家一聽到消息之後已經等到頸都長，而今日gram終於喺尖沙咀開幕啦！搵食CONY梗係唔會執輸，率先為大家試食，仲闖入廚房偷睇整個烹調程序，你都想睇？繼續碌你個LINE啦！

人氣pancake每日限定

一講到gram，大家第一時間會諗起佢三層高好「動L」嘅Premium Pancake。話說呢款pancake喺日本每日有三個時段限售20份，嚟到香港亦同樣，但唔同嘅係gram為咗切合香港文化，香港嘅客人可以拎籌，唔似日本咁一定要企定定排隊，十分貼心。

之但係呢份pancake有咩咁架勢，要每日限量呢？原來佢一份要整30分鐘，而每次一輪最多只係整到5份，所以每個時段20份其實都要花兩個鐘完成，係心機之作。日本人作風嚴謹大家都知，所以日本本部專登派日本主廚來港教授，而且店內所有班戟都即叫即整，而班戟漿喺每次煎之前先打好，然後以煎焗方式烹調，保證新鮮熱辣。

gram嘅Premium Pancake同坊間普遍嘅梳乎厘班戟，明顯係質感上有少許唔同，較為挺身，所以先疊到三層高。而配料方面十分簡單，有牛油、蜂蜜和鮮忌廉，而蜂蜜同鮮忌廉都係分開放喺旁邊，唔會喧賓奪主，亦可以食到班戟嘅原味。

講返味道方面，CONY覺得佢好重蛋白香味，鬆軟得嚟唔係入口即溶，反而仲有少少口感，鍾意有咬口嘅CONY就好喜歡呢種質感，而且食落唔會容易覺得膩。至於配料嘅鮮忌廉好滑，蜂蜜嘅甜度適中，牛油就為班戟添一點鹹香。

其他選擇

如果唔鍾意食梳乎厘班戟，而鍾意食美式班戟嘅話，gram亦有提供多款選擇，包括甜食和鹹食，當中比較特別嘅有Tiramisu班戟、墨西哥辣肉醬班戟和三文魚牛油果班戟。不過利申CONY無咁大個胃試食晒咁多款，麻煩讀者們試食完再話番我知好唔好食啦。

Cafe & Pancake Gram

地址：尖沙咀彌敦道100號The ONE 4樓L408舖