守株待兔？不如自己落手做！
武漢肺炎爆發之後，除咗口罩一個難求之外，連帶所有消毒殺菌嘅產品都一樣成為大家搶購嘅目標。以前藥房好容易就買到嘅消毒酒精，都彷彿消失咗喺呢個世界咁樣，跑十幾廿間都買唔到一支。但係本着香港人打不死嘅精神，又點會坐以待斃呢？唔少網民都開始「自救」，研究點樣自製酒精搓手液，即使效果未必完美，都頂住當先啦。
根據GoogleTrends顯示，喺香港地區用關鍵字「搓手液」嚟搜尋相關主題，入面可以見到最近3個月嚟都有好多人喺到搜尋點樣自製搓手液，小編今次就用《KEYPO大數據關鍵引擎》幫大家調查咗喺自製搓手液嘅關鍵領袖，一齊嚟睇吓啦！
wongtsuiyu（黃翠如）
消毒產品周圍撲都未必買到，而酒精當然都一早斷晒貨。早喺1月28號年初四，黃翠如已經係佢嘅Instagram上面教大家自製消毒搓手液。翠如bb開post，公開佢妹妹自製嘅搓手液嘅材料同成分，呼籲大家一齊做吓手工，一齊消毒打贏呢場仗咁話～ 雖然買唔到酒精姐，不過大部分化學原材料都仲可以買得到，自己整完再送俾一班親朋好友，真係分分鐘開心過收利是！
image source:IG/wongtsuiyu
K Kwong
由博士教大家DIY做消毒搓手液梗係零舍有說服力啦，化學博士K.Kwong 喺Facebook上面除咗分享點樣用乙醇、甘油、清水自製消毒搓手液之外，亦都有提醒大家正確嘅消毒觀念：生物用濃度70度酒精搓30秒，而死物就可以用1:99漂白水消毒。另外呢個自製消毒抹手液仲有個好處，就係冇酒精咁乾燥，消毒嘅同時亦都對皮膚冇咁大刺激，大家如果買到材料嘅都可以試一試！
image source:Facebook/K Kwong
The Hong Kong Polytechnic University
成日都話學以致用，理工大學今次就做咗完美示範啦。理大應用生物及化學科技學系嘅副教授容博士，率領同事同埋一班研究生，合力製造一批消毒搓手液，透過社會福利署送俾長者同弱勢社群。大家都知，一般長者可能比較容易忽略消毒，而弱勢社群未必有能力負擔消毒用品，理大教授同研究生為社會出一分力真係抵讚呀！
image source:Facebook/The Hong Kong Polytechnic University搓手液 兩支thx
雖然宜家喺網上面一搵就大把自製酒精搓手液嘅教學，不過搓手液嘅消毒效果始終都好在乎比例，萬一比例唔啱，消毒效果可能大打折扣。加上香港人咁忙碌，未必有時間喺屋企自己慢慢溝，所以好多人都仍然會繼續尋覓市場上唔同牌子嘅搓手液，亦都會比較吓價錢、產地、成分等等，做個精明消費者。今日就等DailyView用網路大數據話你知以下呢七款就係網路熱度比較高嘅牌子，我哋一齊嚟睇吓有乜分別啦～
7 Swashes 詩樂氏（117筆）
Swashes 詩樂氏喺80年代成立，宜家已經有30幾年嘅歷史，亦係目前全國各大醫院使用嘅首選消毒產品。使用方法同有效殺菌程度同其他品牌差唔多，不過詩樂氏喺消毒啫喱要搓嘅時間就比較耐啦，要達到有效嘅消毒效果，擠係手上之後要充分搓洗3至5分鐘直至乾透，算係喺同類型嘅產品入邊需時最耐嘅一款清潔啫喱啦。
image source:Facebook/ Mamatown
6 Eco Finest（257筆）
由香港公司監製，出口美國嘅Eco Finest酒精消毒搓手液，殺菌率高達99.99%，加入保濕成分同維他命E，消毒同時保護雙手皮膚，使用適量喺掌心搓勻，直到乾爽就得。呢款搓手液嘅酒精濃度係75%算係同類型產品入面較高，不過濃度都唔係越高越好，一般60度以上都已經可以有效消毒，70度嘅效果就係最好。
image source:hktvmall
5 Cellapy 思理膚（298筆）
來自韓國嘅Cellapy用嘅包裝喺一堆消毒搓手液入面最與眾不同，唔係使用膠樽而係用袋裝，白色同湖水綠色嘅設計夠晒韓國文青味。Cellapy其實係韓國高級嘅藥妝品牌，喺好多皮膚科、整形外科嘅地方都可以見到佢哋嘅消毒產品。呢款搓手液同樣無需水洗殺菌率達99%，加入天然潤膚成份，消毒同時滋潤皮膚，令大家精神緊張消毒多幾次都唔怕手乾。
image source:Facebook/Mo Mo Shop
4 Purell（384筆）
連美國醫院都使用，再加上唔少醫護人員推薦，Purell 呢個美國品牌嘅消毒酒精搓手液亦都係唔少人嘅選擇。喺美國製造，酒精濃度有70%，有效清潔雙手。溫和嘅配方，直接用適量份量搓手15秒，之後就可以消滅99.9%嘅細菌，使用之後唔需要過水。用完之後隻手都好乾爽，再加上4種保濕成分，用多幾次都唔驚對手乾到裂。
image source:Facebook/PURELL
3 Walch 威露士（424筆）
「威露士 我用威露士，齊齊洗手更容易～」聽過呢句歌詞嘅話，就暴露咗你嘅年齡啦！同滴露一樣喺舊年被環保團體「世界綠色組織」公布為通過生物化學測試成份篩查嘅其中兩款搓手液，殺菌效果同安全性有保證。除咗潔手液，威露士亦都有推出一系列嘅消毒產品，可以話係真係一條龍服務。消毒方法其實都大同小異，最緊要都係大家要記得勤消毒多洗手呀！
image source:Facebook/Walch Hong Kong
2 Dettol 滴露（1397筆）
唔知有冇人同小編一樣由細到大都好鍾意聞滴露嗰陣味呢？滴露呢個牌子，係香港人都應該唔會陌生，大部份屋企亦可能長時間都會擺定一支滴露抹下屋企，而家非常時期更加要用嚟做多幾次全屋消毒。滴露經典松木香嘅消毒搓手液，使用少量磨擦雙手等待蒸發之後，就可以殺滅99.9%細菌。可以隨身攜帶消毒，又聞到滴露經典嗰陣味，對於「滴露迷」嚟講就梗係首選啦。
image source:Facebook/滴露香港 Dettol Hong Kong
1 Schülke（2952筆）
Schülke嚟自德國，喺德國診所、醫院等等地方都係用呢款消毒產品，聽落就知勁啦。作為全球第一個消毒劑品牌，除咗一般大家比較常聽到嘅病毒，例如H1N1病毒、手足口病病毒等等，連一啲讀起上嚟都有困難嘅棘手細菌「艱難梭狀芽孢桿菌」，都一樣可以有效消滅。一般消毒雙手嘅話只需要3ml 搓手30秒就搞掂，Schülke一直致力於預防控制微生物污染，咁多年經驗，絕對係信心嘅保證。
image source:Facebook/Salalabeauty
【香港網路溫度計調查結果之圖文，未經授權請勿轉載、改寫】
分析說明：
本研究資料由《KEYPO大數據關鍵引擎》提供，分析時間範圍為2019年12月25日至2020年03月23日/2019年03月25日至2020年03月23日。
網路大數據系統觀測港澳地區上萬個網站頻道，包括新聞頻道、Facebook、Instagram及各大討論區、BLOG等，針對討論『自製搓手液/搓手液品牌』相關文本進行分析，並根據網友就該議題之討論，作為本分析依據。
本文分析之結果，非參考投票、民調、網路問卷等資料，名次僅代表網路討論熱度大小，不代表網友正負評價。