演員做戲做得入型入格，絕對會影響觀眾睇劇嘅投入程度。不過，亦因為歷年被角色定形演員亦不計其數，其中以下呢10位演員相信就係當中最好例子！
撰文：東方新地｜圖片：劇照、Instagram
盤點TVB10個被角色定形演員
｜吳卓羲－衝動派警察
吳卓羲由2003年開始就已經拍攝同警察有關題材嘅劇集，，截至上年嘅《飛虎之潛行極戰》總共飾演警察部隊16次，網友笑言吳卓羲過去13年履歷不斷更新，不停轉部門！
不過相信大家最記得嘅，係有吳卓羲做警察就一定會有因衝動而壞大事嘅一幕，所以先會有「衝動派警員」次稱！
｜王敏德－飛虎
擁有中法荷蘭血統嘅王敏德，身形高大兼一臉硬漢樣，最擅長就係飾演警察中飛虎嘅角色。多年來，王敏德多次出演警察角色，而佢扮演警隊高層嘅形象，更可謂完全入屋！
2003年，王敏德更憑1994年嘅《飛虎雄心》中，飾演香港警務處特別任務連教官Stone Wong一角，並喺香港電台和香港警務處聯合舉辦嘅「香港理想銀幕警察」選舉中奪冠，可想而知佢警察形象如何深入民心！
｜黃子雄－有錢佬
被稱為TVB「御用有錢人」嘅黃子雄（Geoff）由入行至今大部分飾演嘅角色都係有錢人，無他嘅，Geoff一向俾人一種專業人士嘅形象，加上天生富貴樣，演有錢人又真係好入形入格！
｜戴耀明－傻仔/色狼
入行27年嘅綠葉王戴耀明雖然戲份少，但幾乎次次出現都好搶鏡，就好似喺《EU超時任務》不慎「動L」咁！
雖然好多網民都話佢演智障人士最出色，不過戴耀明就曾表示無論係咩角色，只要觀眾諗起某個角色會第一時間諗起自己，佢都已經好滿足！
｜郭田葰－醫生
現時37歲的郭田葰（Marcus），講名大家可能未必有印象，但一見到Marcus個樣就會諗起佢成日喺劇中扮演醫生！由民初劇30年代嘅醫生、到牙醫、手術科、婦科、急症室醫生，至今演過逾百次醫生角色！
Marcus雖然醫生形象深入民心，但其實現實中佢都曾經係一位急症室醫生，名副其實真正嘅醫生演醫生！
｜馬蹄露－潑婦 / 八婆 / Mean精
淨係馬蹄露呢個名，相信大家嘅腦海中即刻就諗起潑婦，皆因佢喺《真情》中嘅佢將刁蠻大小姐性格發揮得淋漓盡致，令唔少觀眾都非常討厭呢個角色！
而且，馬蹄露更喺多套劇集中飾演尖酸刻薄嘅角色，例如《畢打自己人》嘅李綺琴、《碧血鹽梟》嘅狡猾姑奶奶胡彩蝶等，均被觀眾大讚勁有老姑婆嘅mean爆味道！
｜陳榮峻－公公
有「TVB御用公公」之稱嘅陳榮峻粗略估計喺演戲生涯中差唔多演過30次公公，入行34年，以奸角及公公角色為觀眾熟悉！
｜盧宛茵－奶奶
至於Mandam Lo之前喺《BB來了》演惡奶奶深入民心，其實佢早喺多部TVB劇集角色如《卡拉屋企》嘅「肥媽」廖仲好、《戇夫成龍》嘅米珠蓮等，都係個Mean爆婦人！
總之一講到盧宛茵嘅名，就等同惡外母同惡奶奶嘅代名詞！
｜陳勉良－保安
正所謂有保安就有陳勉良，但咪睇佢扮演他安似模似樣，其實佢仲係一位國畫大師，好多時佈景出現嘅書法或古畫都係出自佢手，大家不妨多多留意下！
｜布偉傑－外藉警司
近年為劇集中「御用鬼佬」嘅布偉傑效力TVB 17年，為唔少劇集嘅「西人警察」代表，只要見到佢就知應該係扮演警察高層～