《香港小姐2020》雙料冠軍謝嘉怡Lisa被喻為近十年最靚港姐，得獎後的謝嘉怡連日出席活動，但幾忙都同父親仆返大埔，原來謝嘉怡祖籍東莞，家族在大埔紥根多年，父女專程到東莞同鄉總會大埔分會探望鄉親，不但被鄉親們以貴賓式款待，更委任她為同鄕會的榮譽會長，威震大埔﹗
文：東方新地 圖：鄧家彪fb、IG
謝嘉怡大埔探親獲貴賓式款待
《香港小姐2020》 出爐冠軍謝嘉怡是蘇格蘭混血兒，以大熱姿態奪得最上鏡小姐及冠軍寶座，自幼在蘇格蘭長大的謝嘉怡唔鹹唔淡的廣東話及率真性格，令大家留下深刻印象，大家都對其背景相當有興趣，先是自爆有個港姐夢的父親，而且相當年輕，落選佳麗源菲然原來係老表，出人意表又點止呢啲，當選後的謝嘉怡與父親急急撲去大埔探親，原來長輩居於大埔多年，今次父女到東莞同鄉會大埔分會探訪鄉親。本身是東莞人的工聯會九龍東總幹事鄧家彪在fb轉貼一名同鄉的發文，分享了謝嘉怡回大埔探親的消息，鄧家彪更話：「這位港姐冠軍真貼地，第一時間去同鄉會認祖歸宗，一齊食龍眼。大家都係東莞同鄉，我鐘意呀！」
鄉親封為「東莞榮光」
消息指原來謝嘉怡的爺爺是大埔老字號「謝華記雞粥」的創辦人，祖輩世居大埔，謝父年輕時移居蘇格蘭，娶了蘇格蘭太太而誕下謝嘉怡，今次父女探親團，得到同鄉會羅會長親自款待，大讚謝嘉怡飲水思源、認祖歸宗，視她為「東芫榮光」，即委任謝嘉怡任同鄉會的榮譽會長﹗貴為《香港小姐2020》冠軍的謝嘉怡，當日索顏加件緊身白上衣，依然好省鏡，難怪深得同鄉親們喜愛，謝嘉怡話每年都會返港探望嫲嫲，定必到大埔一遊，對大埔的感覺係如同第二個家。
素顏與男忠粉撐枱腳
雖然謝嘉怡連日疲於出席港姐活動，除了到大埔探親之外，亦抽空答謝她口中的「頭號粉絲」，二人雙雙飯敍，相片中謝嘉怡同一名戴住黑招、手臂有紋身的男子撐枱腳，網民紛紛留言指黑超男係其男友，原來謝嘉怡口中的「頭號粉絲」正是她的父親。雖然貴為香港小姐，當日謝嘉怡身穿牛仔工人褲，亦如她口中不喜化妝，當日索顏上鏡，少了分艷麗，但多了一份清純，有網民留言指素顏的謝嘉怡，靚過晒無綫班女藝人，揚言想入行拍劇的謝嘉怡，靚樣性格又可愛，又承諾會學好中文，相信成為第二個觀眾緣極佳嘅香香指日可待。
謝嘉怡為圓父夢：爸爸想我嚟選，所以我嚟咗﹗
《香港小姐2020》三甲誕生，來自蘇格蘭的25歲混血佳麗謝嘉怡一句「爹哋想我嚟選所以我嚟咗」而惹得全場發笑，最後成功圓父夢登上港姐冠軍寶座。謝嘉怡率真表示當選後最想食排骨飯，無綫全程直擊謝嘉怡得獎後跟家人慶祝過程，同時令後生謝父曝光，網民驚訝似拖友多過父女。在《香港小姐2020》決賽上，最後五強佳麗包括何孟珊、鄺美璇、郭柏妍、陳楨怡及謝嘉怡逐一到台上講感言時，五位佳麗都表現激動、語帶哽咽，何孟珊更講到走晒音，不過廣東話麻麻的謝嘉怡（Lisa）卻令全場捧腹大笑：「爸爸由我未識行就叫我去選港姐，我唔選，因為我唔係好女仔，平時唔化妝、唔著高踭鞋，爸爸想我嚟選，所以我嚟咗！」令台下一眾藝員嘉賓大笑。當選後被主持問到最想做咩，性格率真的Lisa話：「我好想食排骨飯、叉燒飯！因為參選要減肥，飲食好節制。」
苦練廣東話有成 爸爸陪練〈上海灘〉
無綫娛樂台直擊謝嘉怡「收工」後跟家人團聚及慶功，開門迎接的是Lisa口中有個港姐夢的父親，謝父原來相當年輕、打扮又潮，先跟女兒攬錫再送上鮮花，父女更一起接受訪問，謝嘉怡在才藝表演獻唱〈上海灘〉令全場相當驚喜，Lisa直言刻意揀唱廣東歌：「我廣東話唔好，大家都以為我唱英文歌，我揀唱中文係想大家知道我可以勤力練好廣東話。」又指姑媽為她翻譯，父親連日為她練歌。
隊完香檳扒排骨飯
謝嘉怡又應主持要求父女在鏡頭前合唱〈上海灘〉，謝父對女兒圓其夢想大感安慰：「因為Lisa有一半喺香港人，覺得去參加港姐好適合。」Lisa更爆自己十七歲時父親叫佢搬到香港，非常搞笑，而Lisa話參選港姐是希望入行拍喜劇，為大家帶來歡樂及正能量。而一直話想食排骨飯的Lisa亦終如圓達成夢想，邊食主持為她預備的排骨飯一邊笑得好開心，相當可愛。
表妹源菲然落選入唔到決賽
唔單止謝父真相曝光，在家人為謝嘉怡安排的慶功宴上，之前被foul出局未能參加決賽的落選佳麗源菲然也在當中，謝嘉怡親揭二人關係，原來是表姊妹，源菲然的媽媽是謝嘉怡的姑姐，而源菲然話參選時亦唔知道表姊會參加，但沒有刻意隱瞞：「啲佳麗都知我哋嘅關係嘅！」 Lisa話綵排時曾傷腳令跳舞環節未能如期綵排，表妹在繁忙的綵排期間也抽時間跟她排練，又謂今次兩老表一起參加香港小姐，這個經驗好特別好難得！